Бо мақсади беҳтар намудани сатҳи хизматрасонӣ дар пойтахт дар ҳудуди ноҳияҳои шаҳри Душанбе бунёду азнавсозии 10 адад меҳмонхонаҳои замонавӣ роҳандозӣ гардидааст, ки 3 адади он мавриди истифода қарор дода шуда, дар боқимонда иншоотҳо корҳои сохтмонӣ ҳоло идома доранд.

Дар ин бора Ҷамшед Табарзода, муовини якуми раиси шаҳри Душанбе 17 феврал зимни нишасти хабарӣ иттилоъ дод.

Номбурда ҳамчунин зикр дошт, ки ҷиҳати ба меъёрҳои шаҳрдорӣ мутобиқ намудани инфрасохтори пойтахт низ ҳоло дар 11 иншооти роҳсозӣ бо дарозии 23,7 километр, 1 адад иншооти ирригатсионӣ бо дарозии 2,43 километр ва дар 26 адад истгоҳҳои нақлиётии замонавӣ корҳои сохтмонӣ бо маром идома доранд. Маблағи умумии онҳо 170 миллион сомониро ташкил медиҳад.

“Дар доираи ҳамкориҳо миёни Ҷумҳурии Тоҷикистон ва Ҷумҳурии Ҳиндустон аз ҳисоби маблағҳои грантии давлати Ҳиндустон лоиҳаи “Сохтмони роҳи автомобилгард аз дарвозаи ғарбӣ то маҳаллаи “Чортут”-и пойтахт, ки тарҳи муштараки Тоҷикистону Ҳиндустон маҳсуб меёбад, бо дарозии 9,2 километр ва паҳноии аз 50 то 70 метр бо маблағи 46,5 миллион доллари ИМА ба нақша гирифта шуда, айни замон корҳо дар қитъаҳои 2 ва 3 бо дарозии 5км бо маром идома дошта, дар марҳилаи анҷомёбӣ қарор дорад”- таъкид кард Ҷамшед Табарзода.