13 апрели соли равон, дар меҳмонхонаи Ҳаят Реҷенсии шаҳри Душанбе вохӯрии Шӯрои ҳамоҳангсозии донорҳо ва шарикони рушд дар соҳаи меҳнат, муҳоҷират ва шуғли аҳолӣ баргузор гардид.

Ҳадаф аз баргузории чунин чорабинӣ, фароҳам овардани замина барои муколамаи сиёсӣ, сафарбаркунии захираҳо, ҳамоҳангсозии шарикони рушд, донорҳо ва вазорату идораҳои Ҷумҳурии Тоҷикистон ҷиҳати ноил шудан ба Ҳадафҳои рушди устувор Стратегияи миллии рушд дар Ҷумҳурии Тоҷикистон ба ҳисоб меравад.

Дар ин вохӯрӣ муовини Сарвазири Ҷумҳурии Тоҷикистон Матлубахон Сатториён, вазири меҳнат, муҳоҷират ва шуғли аҳолии Ҷумҳурии Тоҷикистон Ширин Амонзода, шарикони рушд, намояндагони вазорату идораҳо ва дигар масъулин иштирок намуданд.

Матлубахон Сатториён зимни суханронӣ аз ҳамкории Хазинаи кӯдакони Созмони Милали Муттаҳид дар Тоҷикистон, Бонки Ҷаҳонӣ, Иттиҳоди Аврупо ва Бонки осиёгии Рушд дар татбиқи як қатор лоиҳаҳо дар соҳаи меҳнат, муҳоҷират ва шуғли аҳолӣ изҳори қаноатмандӣ намуда, изҳор дошт, ки масъалаҳои муносибатҳои меҳнатӣ, муҳоҷирати аҳолӣ, таҳсилоти ибтидоии касбӣ ва дар ин замина ба шуғл, бахусус бо шуғли пурмаҳсул ҷалб намудани шаҳрвандони кишвар зери таваҷҷуҳи пайвастаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Ширин Амонзода зикр намуд, ки барномаи ислоҳоти бунёдии соҳаи меҳнат, муҳоҷират ва шуғли аҳолӣ то соли 2026 татбиқ намудани як қатор чораҳои муассир дар соҳаи таҳсилоти ибтидоии касбӣ, танзими муносибатҳои меҳнатӣ, мусоидат ба шуғли шаҳрвандони бекор, ба танзим даровардани раванди муҳоҷирати меҳнатӣ, ҳаллу фасл намудани мушкилиҳои ҷойдошта дар самти муҳоҷирати дохилӣ ва экологӣ ва монанди инҳоро дар бар мегирад.

- Расидан ба ин ҳадафҳо бе кумаки шарикони рушд ва донорҳо, ҷалби манбаъҳои иловагии сармоягузорӣ, кумакҳои техникӣ ва омӯзиши таҷрибаи пешқадами байналмилалӣ душвор аст,-илова кард вазир.

Зуҳро РИЗОЗОДА,
коромӯзи “ҶТ”