Як назарсанҷие дар Эрон муайян кардааст, ки 73 % мардуми Эрон хостори ҷудоии дин аз сиёсат ҳастанд.

Дар ин бора бахши форсии BBC хабар додааст.

Бино ба иттилои манбаъ, дар ин назарпурсӣ 15 ҳазору 878 нафар сокинони касбу кори гуногун аз тамоми минтақаҳои Эрон иштирок карда, ба таври ошкоро хостори низоми ғайримазҳабӣ дар ин кишвар шудаанд.

Ба гуфтаи пурсидашудагон, ҷомеаи Эрон бо гузашти солҳо ғайримазҳабитар гашта истодааст ва беҳтар он аст, ки дар сатҳи Ҳукумат аз ин биандешанд ва мисли соири кишварҳо динро аз сиёсат ҷудо кунанд.

Назарсанҷӣ аз ҷониби дафтари тарҳҳои миллии Вазорати фарҳанг ва иршоди исломӣ дар ҳамкорӣ бо як маркази рушди иҷтимоии ин кишвар таҳия ва гузаронида шудааст.

Гуфта мешавад, ки ин чаҳорумин назарсанҷиест, ки Вазорати фарҳанг ва иршоди исломӣ дар ҳамкорӣ бо ин марказ баргузор мекунад ва то ҳол ба чунин натиҷа нарасида буданд.