Дар вилояти Хатлон шумораи ҷавонон дар ҳайати кадрҳои роҳбарикунанда 721 нафарро ташкил медиҳанд, ки нисбати ҳамин давраи соли гузашта 67 нафар зиёд мебошад.

Дар ин бора 1 август Рамазон Насриддинзода, сардори Раёсати кор бо ҷавонон ва варзиши вилояти Хатлон зимни нишасти хабарӣ ба рӯзноманигорон иттилоъ дод.
Ба таъкиди масъулин, дар вилоят шумораи вакилони Маҷлиси вакилони халқи шаҳру ноҳияҳо 203 нафар аз ҳисоби ҷавонон буда, нисбати соли пешин 23 нафар зиёд аст. Дар ҳайати Маҷлиси вакилони халқи ҷамоатҳо бошад, ҷавонон 619 нафарро ташкил дода, нисбати соли пеш 136 нафар зиёд аст.

Инчунни сардори раёсат зикр кард, ки сатҳи ҷинояткорӣ байни ҷавонон дар шаҳру ноҳияҳои вилояти Хатлон дар ин давра 518 ҳолатро дар бар мегирад, ки нисбати ҳамин давраи соли гузашта 152 ҳолат кам мебошад.

- Бо вуҷуди кам гардидани сатҳи ҷинояткорӣ, аммо дар шаҳру ноҳияҳои Абдураҳмони Ҷомӣ 9 ҳолат, Ҳамадонӣ 8, Шаҳритус 5, Фархор 4, Вахш, Ҷалолиддини Балхӣ, Муъминобод 3 ҳолатӣ ва шаҳри Бохтар 2 ҳолат нисбати ҳамин давраи соли сипаригардида зиёд шудааст, ки тибқи таҳлилҳо сабабҳояш дур мондани ҷавонон аз чорабиниҳои маърифатӣ – фарҳангӣ, беназоратӣ ва сатҳи пасти дониши онҳо мебошад, - гуфт Рамазон Насриддинзода.