24 ноябр дар шаҳри Бохтари вилояти Хатлон чорабинии тантанавӣ бахшида ба Рӯзи Парчами давлатии Ҷумҳурии Тоҷикистон баргузор гардид. Дар ин бора Раёсати кор бо ҷавонони вилояти Хатлон иттилоъ медиҳад.

Тибқи иттилои манбаъ, дар чорабинии мазкур раиси вилояти Хатлон Давлаталӣ Саид, муовинони раиси вилоят, раиси шаҳри Бохтар, роҳбарони ташкилоту идораҳои давлатӣ, кормандони касбу кори гуногун, омӯзгорон, донишҷӯён ва ғайра ширкат намуданд.

Гуфта мешавад, роҳпаймоӣ бо иштироки зиёда аз 40 ҳазор нафар намояндагони касбу кори гуногун аз терминали мусофиркашонии шаҳри Бохтар то майдони Исмоили Сомонӣ доир гардид.

Сипас раиси вилоят Давлаталӣ Саид суханронӣ намуда, ҳозиринро ба ин санаи таърихӣ таҳният гуфта, парчамро ҳамчун рамзи давлати миллӣ дар ҳама давру замон муаррифӣ намуд.

- Чунон ки Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон гуфтаанд: “Парчами миллӣ – яке аз рамзҳои муҳими Истиқлоли миллӣ ва давлатдории муосири мо, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷикистон мебошад, - иброз дошт раиси аилоят.

Дар охири ҳамоиши тантанавӣ аз ҷониби ҳунармандони Раёсати фарҳанги вилоят чорабинии фарҳангӣ манзури ҳозирин гардонида шуд.