Дар мавсими имсолаи сафар ба ҳаҷ аз Ҷумҳурии Тоҷикистон ду шаҳрванд бо марги табиӣ вафот кардаанд. Дар ин бора Давлатзода Сулаймон, раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон 3 феврал зимни нишасти матбуотӣ иттилоъ дод.

- Дар мавсими имсола 2 нафар шаҳрванди ҷумҳурӣ бо марги табиӣ вафот карданд, ки тибқи муқаррарот дар он ҷо ба хок супорида шуданд, - гуфт ӯ.

Ҳамзамон зикр гардид, ки дар соли 2022 аз ҷониби кишвари мизбони ҳаҷ ба Ҷумҳурии Тоҷикистон 3562 адад квотаи ҳаҷ ҷудо карда шуд. Кумита тибқи тартиб корҳои омодагиро ба мавсими ҳаҷ оғоз намуда, дар мувофиқа бо Хадамоти зиддиинҳисории назди Ҳукумати кишвар арзиши хизматрасониҳо барои ҳаҷи соли равонро 60 ҳазору 520 сомонӣ муайян намуд.

Гуфта шуд, ки барои анҷоми маросими ҳаҷ асосан шаҳрвандоне сафарбар гардиданд, ки ҳанӯз соли 2020 навбаташон расида буду бинобар сабаби хуруҷи бемории COVID-19 имкони адои ҳаҷро надоштанд.

Таъкид гардид, ки соли гузашта бозгашти ҳаҷравандагон ба ватан 16 июл шуруъ гардида, 1 август ба итмом расид.