Хайриддин Усмонзода, директори Маркази тадқиқоти стратегии назди Президенти Ҷумҳурии Тоҷикистон 4-уми август зимни нишасти матбуотӣ аз вазъи имрӯзаи равобити кишварҳои Тоҷикистон ва Қирғизистон ёдовар шуд.

Ӯ зимни суханронии худ қайд кард, ки айни замон байни ин ду кишвар равобити дӯстона ҷараён дошта, ҳарду кишвар кӯшиш намуда истодаанд, то бо роҳи маслиҳатомез ва бе мудохилаи кишвари сеюм боқимонда хати сарҳадии байни кишварҳоро муайян созанд.

“Ман итминони комил дорам, ки масъалаҳои дигар вобаста ба марз ва боз намудани гузаргоҳҳои сарҳадие, ки миёни ин ду кишвари ҳамсоя аст, ҳалли худро меёбанд ва айни замон гуфтушунидҳо миёни тарафҳо идома дорад” - гуфт Хайриддин Усмонзода.

Ҳ. РАҲМАТУЛЛОЕВ, “ҶТ”