Дар шашмоҳаи аввали соли 2024 аз Русия 17 ҳазор муҳоҷири тоҷик ихроҷ шудаанд.

Ин нукта зимни нишасти хабарии Вазорати меҳнат, муҳоҷират ва шуғли аҳолии кишвар гуфта шуд.

Гулнора Кенҷа, вазири меҳнат, муҳоҷират ва шуғли аҳолӣ дар нишасти хабарӣ гуфт, ки сабабҳои ронда шудани муҳоҷирон гуногун аст, аз ҷумла риоя накардани қонунҳои Русия. Инчунин, ӯ риоя накардани реҷаи 90 ба 180 ва дигар омилҳоро гуфт.

Ӯ гуфт дар ин давра, аз ҷумла, 332 ҳазор қоидавайронкунии маъмурии ночиз аз ҷониби муҳоҷирони тоҷик ба қайд гирифта шудааст.

Ҳамзамон зикр гардид, ки ҳангоми санҷиши ҳолати манъи вуруди шаҳрвандон ба Русия 4731 нафарро (4163 нафар мард ва 568 нафар зан), ки дар рӯйхати манъшудагон дар махзани маълумот мавҷуд буданд, аз сафар ба Русия баргардониданд. Аз ин шумора, ба 1487 нафар ба касбомӯзӣ ва ба 679 нафар барои ба кор таъин шудан дар дохили кишвар тавсия дода шуд. Дар натиҷа 776 нафар соҳиби касб гардида, 263 нафар дар дохили кишвар бо ҷойи кор таъмин шуданд.