Дар ҷараёни гузаронидани рейдҳо аз ҷониби Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон ҳолатҳои қонуншиканӣ вобаста ба вайрон намудани Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” ошкор гардид.

Дар ин бора 1 август Сулаймон Давлатзода, раиси Кумитаи дин, танзими анъана ва ҷашну маросим зимни нишасти матбуотии ниҳодаш, ба журналистон иттилоъ дод.

Ӯ инчунин изҳор дошт, ки дар ин давра тибқи маълумоти пешниҳоднамудаи комиссияҳои доимии танзими анъана ва ҷашну маросими мақомоти иҷроияи ҳокимияти давлатии вилоятҳо ва шаҳру ноҳияҳо аз ҷараёни баргузории маъракаҳо 12475 рейд, аз ҷумла, дар шаҳри Душанбе 2939, ВМКБ 52, вилояти Суғд 1946, вилояти Хатлон 3741, шаҳру ноҳияҳои тобеи ҷумҳурӣ 3797 гузаронида шудааст.

Таъкид шуд, тибқи маълумоти пешниҳоднамудаи Суди Олии Ҷумҳурии Тоҷикистон ҳангоми баргузории рейдҳо 419 (ҳамин давраи соли гузашта 416 ҳолат) ҳолати қонуншиканӣ вобаста ба вайрон намудани Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” ба кайд гирифта шудааст, ки нисбати ҳамин давраи соли гузашта 3 ҳолат зиёд мебошад.

Чунин қонуншиканиҳо дар шаҳри Душанбе 61 (ҳамин давраи соли гузашта 50) ҳолат, ВМКБ 15 (ҳамин давраи соли гузашта 8) ҳолат, вилояти Суғд 116 (ҳамин давраи соли гузашта 127) ҳолат, вилояти Хатлон 142 (ҳамин давраи соли гузашта 165) ҳолат ва ШНТҶ 85 (ҳамин давраи соли гузашта 66) ҳолат ба қайд гирифта шудааст.

Ф. УМАРАЛӢ,
Р. ОДИНАЕВ, “ҶТ”