5 июн дар назди шаршараи Муассисаи давлатии “Наврӯзгоҳ”-и пойтахт бо ташаббуси Мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати иҷрои қарори раиси шаҳри Душанбе дар бораи таҷлили Рӯзи байналмилалии муҳити зист дар шаҳри Душанбе чорабинии фарҳангӣ-фароғатӣ доир гардид.

Дар ин бора дафтари матбуоти шаҳрдорӣ хабар додааст.

Бино ба иттилои манбаъ, пеш аз оғози чорабинӣ меҳмонону иштирокчиён аз намоишгоҳи дастовардҳои соҳа ва маҳсулотҳои аз нигоҳи экологӣ тоза, ки аз ҷониби мақомоти иҷроияи ҳокимияти давлатии чор ноҳияи пойтахт ва муассисаҳои таҳсилоти миёна, ибтидоӣ ва олии касбии ҳудуди пойтахт ба маъраз гузошта шуда буд, дидан намуда, ба онҳо баҳои баланд доданд.

Нахуст Сулаймон Зиёзода, муовини Сарвазири Ҷумҳурии Тоҷикистон баромад намуда, аз ташаббусҳои созандаи муҳтарам Эмомалӣ Раҳмон дар ин самт ёдовар гардид.

Баъдан Толиб Раҳимзода, муовини раиси шаҳри Душанбе суханронӣ намуда, табрикоти раиси шаҳри Душанбе муҳтарам Рустами Эмомалиро вобаста ба Рӯзи байналмилалии муҳити зист ба меҳмонону ҳозирин ва сокинони пойтахт расонид.

Баҳодур Шерализода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон зимни суханронии хеш иброз дошт, ки мақсади асосии таҷлили Рӯзи байналмилалии муҳити зист, тозаву озода нигоҳ доштани атроф, фароҳамсозии фазои тозаи экологӣ, ҳифзи муҳити солим ва таъмини маҳсулоти аз нигоҳи экологӣ тоза мебошад.

Дар охир, барномаи фарҳангӣ-фароғатӣ пешкаши меҳмонону иштирокчиён гардонида шуд.