Дар маркази ноҳияи Роштқалъа бо иштироки муовини сардори Раёсати кор бо ҷавонон ва варзиши Вилояти Мухтори Кӯҳистони Бадахшон Бачабеков Аслиддин, президенти Федератсияи муайтайи Ҷумҳурии Тоҷикистон Мирзоҷалил Ҷалилов, директори Муассисаи давлатии маркази тайёрии олимпӣ дар вилоят Холдоров Мулкамон ва масъулини соҳаи кор бо ҷавонон ва варзиши ноҳия бо ҷавонон ва варзишгарон семинари омӯзишӣ баргузор гардид.

Дар ин бора аз Бахши кор бо ҷавонон ва варзиши ноҳияи Роштқалъа хабар доданд.

Тибқи иттилоъ, масъулин дар семинар вобаста ба одоби варзишгар зимни иштирок дар мусобиқаҳои варзишӣ, эҳтироми якдигарӣ, арҷ гузоштан ба муқаддасоти миллӣ, истифодаи дурусти шароиту имкониятҳои фароҳамовардаи давлату Ҳукумати Ҷумҳурии Тоҷикистон ва дигар масъалаҳои марбут ба варзиш суханронӣ намуданд.

Дар фарҷом як қатор ҷавонон ва варзишгарони ноҳия бо туҳфаҳои хотиравӣ қадрдонӣ шуданд.

Наҷиба МУРОДБЕКОВА, “ҶТ”