Рустам Назарзода, раиси Кумитаи ҳолатҳои фавқулодда ва мудофиаи граждании назди Ҳукумати ҷумҳурӣ,  21 июл, зимни нишасти матбуотӣ зикр кард, ки дар шаш моҳи соли равон, дар ҳудуди ҷумҳурӣ 41 ҳолати фавқулоддаи дорои хусусияти табиӣ ба амал омадааст. Бар асари офатҳои табиӣ 10 нафар шаҳрванди ҷумҳурӣ ба ҳалокат расидаанд, ки ин шумора соли гузашта 28 нафарро ташкил медод.

Аз ҳолатҳои фавқулоддаи дорои хусусияти табиӣ 121 миллиону 130 ҳазору 300 сомонӣ зарари моддӣ расидааст. Ин шумора соли 2015 174 миллиону 318 ҳазору 200 сомониро ташкил медод. Дар нимсола 955 хонаи истиқоматӣ (72 хона пурра), 12331,33 гектар заминҳои кишт, 88 гектар хоҷагии ҷангал зарар дидаанд. Ба хонаводаҳои зарардидҳа аз ҳисоби буҷаи давлатӣ кӯмаки яквақтаи моддӣ дар ҳаҷми умумии 4 миллиону 343 ҳазору 650 сомонӣ ҷудо карда шудааст.  

Ба гуфтаи Р. Назарзода, дар натиҷаи риоя накардани қоидаҳои бехатарӣ ҳангоми шиноварӣ дар дарёҳо ва кӯлҳо 61 сокини кишвар (то синни 17 32 нафар, аз 17-сола боло 29 нафар) ҳалок гардидаанд.