Дар нимсолаи якуми соли 2026 дар Тоҷикистон 11 ҳазору 731 ҷиноят ба қайд гирифта шудааст, ки нисбат ба ҳамин давраи соли гузашта 1 ҳазору 358 ҳолат кам буда, сатҳи ҷинояткорӣ 10,3 фоиз коҳиш ёфтааст. Ба гуфтаи Ҳабибулло Воҳидзода, Прокурори генералии Ҷумҳурии Тоҷикистон, дар шаш соли охир бори аввал аст, ки сатҳи ҷинояткорӣ то ба ин андоза паст шудааст.

Зимни нишасти хабарӣ зикр гардид, ки дар ин давра шумораи ҷиноятҳои вазнин, аз ҷумла дуздӣ, таҷовуз ба номус ва савдои одамон низ коҳиш ёфтааст. Аз ҷумла, ҳолатҳои савдои одамон аз 44 адад дар нимсолаи аввали соли 2025 ба 22 адад дар ҳамин давраи соли 2026 расида, 50 фоиз кам гардидааст.

Ҳамчунин, мақомоти прокуратура дар нимсолаи аввал 4 ҳазору 698 санҷиш гузаронида, ҳуқуқу манфиатҳои 235 ҳазору 586 нафарро барқарор намудаанд. Бо дахолати прокуророн беш аз 1 миллиарду 159 миллион сомонӣ, аз ҷумла 365 миллион сомонӣ ба манфиати давлат барқарор гардидааст.

Гулафшон КАРИМОВА, “ҶТ”