Соли 2019 дар ҷумҳурӣ 14 иншооти фарҳангӣ, аз ҷумла 5 қасри фарҳанг, 2 китобхона, 1 осорхона, 6 боғи фарҳангию фароғатӣ бунёд гардида, 15 муассисаи фарҳангӣ, аз ҷумла 5 қасри фарҳанг, 4 хонаи фарҳанг, 1 филармонияи халқӣ, 2 китобхона, 3 осорхона, 11 боғи фарҳангию фароғатӣ таъмири куллию ҷорӣ шудаанд ва сохтмони 4 иншооти фарҳангӣ идома дорад.

Дар ин бора, Давлатзода Зулфия, вазири фарҳанги Ҷумҳурии Тоҷикистон шашуми феврал зимни нишасти хабарӣ иттилоъ дода, дар идома гуфт: “Дар маҷмӯъ дар ҷумҳурӣ 6 050 китобхона фаъолият мекунанд. Аз ҷумла як Китобхонаи миллӣ, 1 Китобхонаи давлатии бачагонаи ҷумҳуриявӣ, 7 китобхонаи вилоятӣ, 65 китобхонаи марказӣ, 1 205 китобхона – филиал, 79 китобхонаи бачагонаи шаҳрӣ, ноҳиявӣ, деҳотӣ, 4582 китобхонаҳои муассисаҳои таълимӣ ва 110 китобхона дар вазорату идораҳо, ташкилоту корхонаҳо фаъолият доранд”.

Дар идома гуфта шуд, ки теъдоди умумии китобхонаҳои ҷумҳурӣ, ки ба шабакаи умумиҷаҳонии Интернет пайваст гардидаанд, 107 адад мебошанд. Вале аз шумораи умумии китобхонаҳои давлатӣ – оммавии назди шуъбаҳо ва бахшҳои фарҳанги шаҳру ноҳияҳои ҷумҳурӣ 266 адад таъмирталаб буда, 53 адад дар ҳолати садамавианд.