Оймуҳаммадзода Илҳомҷон, сардори Саридораи геологияи назди Ҳукумати Ҷумҳурии Тоҷикистон, 17 июл, зимни нишасти матбуотӣ зикр намуд, ки Тоҷикистон дорои захираҳои зиёди геологӣ, аз ҷумла тилло, нуқра, сурб, ашёҳои радиактивӣ, металҳои ранга, сангҳои қиматбаҳо, нимқиматбаҳо, ороишӣ, маводи сохтмонӣ ва ғайраҳо мебошад ва дар натиҷаи корҳои гузаронидашуда захираҳо бо категорияҳои гуногун ҳисоб шуда, сармояи давлат аз ҳисоби тилло, ангишт ва дигар захираи конҳо ғанӣ гардидааст. 

Таъкид гардид, ки андози аз ҷониби Саридора барои иҷрои корҳои иктишофи геологӣ ба буҷаи давлат супоридашуда дар 6 моҳи соли ҷорӣ 3 млн. 959 ҳазору 318 сомониро ташкил додааст, ки 189 фоизи маблағҳои ҷудошударо дар бар мегирад. Ҳамчунин, то имрӯз 2 ҳазору 810 харитаҳои геологии зуҳуроти канданиҳои фоиданоки ҷумҳурӣ рақамӣ кунонида шуда, бо 22 ширкатҳо қарордоди истифодаи қаъри замин баста шудаанд. 

 “Бо вуҷуди ҳамасола гузаронидани корҳои зиёди омӯзиши геологӣ ва амалисозии лоиҳаҳои хурду бузурги шартномавию пудратӣ дар ин самт, ба роҳ мондани корҳои иктишофи геологӣ бо мақсади таҳқиқу омӯзиши захираҳои канданиҳои фоиданок, дар ҷумҳурӣ ҳанӯз мавзеъҳои таҳқиқнашуда зиёданд”, - гуфт сардори Саридораи геология.