Дар Тоҷикистон воситаҳои нақлиётии боркаши барқии то 5 тонна мавриди истифода қарор хоҳад гирифт.

Барои пиёда кардани ин ҳадаф дирӯз Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ бо директори минтақавии ширкати “BYD”-и Ҷумҳурии Мардумии Чин дар Осиёи Марказӣ Иван Сао мулоқот намудааст.

Тавре аз шуъбаи иттилоотии дастгоҳи раиси шаҳри Душанбе хабар доданд, дар мулоқот ҳолати кунунӣ ва дурнамои муносибатҳои ҳамкорӣ байни Мақомоти иҷроияи ҳокимияти давлатии шаҳри Душанбе ва ширкати “BYD”-и Ҷумҳурии Мардумии Чин мавриди муҳокима қарор гирифта, вобаста ба самти фаъолияти ширкат ва имконияти ду давлат дар самти рушди мошинсозӣ гуфтугуҳо сурат гирифтааст.

Гуфта мешавад, ҳамчунин доир ба амалӣ намудани ҳамкорӣ дар самти банду басти микроавтобусҳои барқӣ, воридоти аккумуляторҳо барои воситаҳои нақлиёти барқиву дигар қисмҳои эҳтиётӣ ҷонибҳо ибрози назар кардаанд.

Ёдовар мешавем, ки масъалаи тавлиди электромобилҳо дар кишвар дар чанд соли охир яке аз масъалаҳои калидӣ дар сатҳи Ҳукумат аст.

Дар ҷаласаи васеи Ҳукумати кишвар Сарвари давлат муҳтарам Эмомалӣ Раҳмон ба Вазорати нақлиёту дигар вазорату идораҳои дахлдор ва мақомоти иҷроияи ҳокимияти давлатиро супориш дода буданд, ки ҷиҳати суръат бахшидани раванди рақамикунонии соҳаи нақлиёти автомобилӣ, истифодаи васеи нақлиёти барқӣ ва роҳандозии инфрасохтор барои нақлиёти барқӣ чораҳои зарурӣ андешанд.