Дар нишасти хабарии Кумитаи ҳифзи муҳити зисти назди Ҳукумати Ҷумҳурии Тоҷикистон, ки имрӯз баргузор гардид, иттилоъ дода шуд, ки дар доираи иҷрои “Барномаи давлатии кабудизоркунии Ҷумҳурии Тоҷикистон барои давраи то соли 2040” нақшаи ниҳолшинонии соли 2026 барзиёд иҷро шудааст.

Бино ба маълумоти пешниҳоднамудаи Исфандиёр Шукурзода, муовини аввали раиси Кумитаи ҳифзи муҳити зисти назди Ҳукумати Ҷумҳурии Тоҷикистон то 31 майи соли 2026 дар саросари кишвар 3 миллиону 774 ҳазору 939 бех ниҳоли дарахтони ҳамешасабзу ороишӣ, сояафкан ва мевадиҳанда шинонида шудааст, ки 104 фоизи нақшаро ташкил медиҳад. Нақшаи пешбинишуда 3 миллиону 622 ҳазору 586 бех ниҳолро дар бар мегирифт.

Ҳамзамон, бо мақсади баланд бардоштани маърифати экологии аҳолӣ дар ҷумҳурӣ 1037 маротиба аксияи “Тозагии соҳил”, 1471 маротиба аксияи “Тозагии маҳал” ва 1260 маротиба аксияи “Тозагии шоҳроҳ” баргузор гардидааст.

Зикр гардид, ки дар доираи татбиқи “Барномаи давлатии экологии Ҷумҳурии Тоҷикистон барои солҳои 2023–2028” ҷиҳати беҳтар намудани муомилот бо партовҳо дар шаҳру ноҳияҳои ҷумҳурӣ 163 камераи назоратии бо панелҳои офтобӣ фаъолияткунанда насб шудааст. Ин камераҳо ба таври онлайнӣ нуқтаҳои осебпазирро назорат намуда, барои пешгирии қонунвайронкунӣ ва беҳтар гардидани вазъи экологӣ мусоидат мекунанд.

Гулафшон КАРИМОВА, “ҶТ”