Дар Ҷумҳурии Тоҷикистон дар нимсолаи аввали соли равон 314 ҳолати фаромадани тарма ба қайд гирифта шудааст, ки ин шумора нисбати ҳамин давраи соли гузашта 48 ҳолат зиёд аст. Вале дар ин баробар ҳолатҳои омадани сел нисбати ҳамин давраи соли гузашта 8 ҳолат камтар шудааст.

Дар ин бора Баҳодур Шерализода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон 31 июл зимни нишасти матбуотӣ иттилоъ дод.

- Дар давоми нимсола оид ба сар задани зуҳуроти тарма 19 пешгӯӣ бо давомнокии 57 шабонарӯз пешниҳод шудааст, ки дар ин муддат 314 тарма ба қайд гирифта шуд. Таҳлилҳо нишон медиҳанд, ки нисбат ба соли гузашта 48 ҳолати зуҳуроти тарма зиёд ба қайд гирифта шуд, - гуфт раиси кумита.

Инчунин, гуфта шуд, ки аз ҷониби ин ниҳод 11 пешгӯӣ бо давомнокии 29 шабонарӯз оид ба зуҳуроти сел дар минтақаҳои кӯҳӣ ва доманакӯҳии ҷумҳурӣ пешниҳод гардида, дар натиҷа 22 ҳолати сар задани зуҳуроти сел ба қайд гирифта шуд, ки нисбати ҳамин давраи соли гузашта 8 ҳолати сар задани зуҳуроти сел камтар аст.

- Барои аз зуҳуроти номатлуби табиӣ эмин нигоҳ доштани соҳаҳо 73 огоҳӣ (шабонарӯз) дар бораи ҳодисаҳои боришоти шиддатнок, вазиши шамол, боридани жола, борон, барф, бавуҷудоии раъду барқ, баландшавии ҳарорати ҳаво, ифлосшаии ҳавои атмосфера ва бадшавии дурии биниш дар минтақаҳои гуногуни кишвар ва ғайраҳо тариқи блютенҳои ҳаррӯзаи обуҳавошиносӣ ва сомонаи расмии Агентии обуҳавошиносӣ ба аҳолӣ пешниҳод гардид, - илова намуд, номбурда.