Соли гузашта дар Тоҷикистон ҳолати зуроварӣ дар оилаҳо нисбати мардону занон дар таносуб ба солҳои пешин афзудааст. Дар ин бора Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон зимни нишасти хабарӣ иттилоъ дод.

Раиси Кумита аз афзоиши ҳолатҳои зӯроварӣ изҳори нигаронӣ карда, гуфт дар соли 2025 3609 ҳолат ба қайд гирифта шудааст, ки аз ин шумора 3019 ҳолат шикоят аз болои мардон ва 590 шикоят аз болои занон мебошад.

Ба қавли Файзиддинзода ин омор нисбат ба соли 2024 403 шикоят аз болои мардон ва 36 шикоят аз болои занон зиёд шудааст. Ба гуфтаи ӯ, ин омор дар муқоиса бо солҳои қаблӣ афзоиш ёфта, нигаронкунанда арзёбӣ мешавад.

Раиси Кумита зикр кард, ки аксари ҳолатҳои зӯроварӣ хусусияти оилавӣ дошта, сабабҳои асосии он нофаҳмӣ дар оила, мушкилоти иҷтимоиву иқтисодӣ, паст будани маърифати ҳуқуқӣ ва фишорҳои равонӣ мебошанд.

Ба гуфтаи масъулин, мубориза бо зӯроварӣ танҳо бо талоши як ниҳод маҳдуд намешавад ва дар ин раванд саҳми тамоми ҷомеа, оила ва муассисаҳои давлатӣ муҳим арзёбӣ мегардад.

Малика МУҚАДДАМОВА, “ҶТ”