Дар Ҷумҳурии Тоҷикистон шумораи истифодабарандагони интернет то ба имрӯз 4,5 миллион нафарро ташкил медиҳад.

Дар ин бора 28 июл Илҳомҷон Атоев, муовини сардори Хадамоти алоқа зимни нишасти матбуотӣ иттилоъ дод.

"Шумораи истифодабарандагони интернет дар якҷоягӣ бо истифодабарандагони интернети мобилӣ 4,5 млн. нафар муштариро ташкил медиҳад”, - гуфт Илҳомҷон Атоев.

Дар идома гуфта шуд, ки дар кишвар шумораи муштариёни умумии алоқаи мобилӣ наздики 8,3 миллион ададро ташкил медиҳад, ки аз он 5,6 миллион ададашон муштариёни фаъол мебошанд.

Инчунин зикр гардид, ки шумораи истифодабарандагони воситаҳои радиоэлектронӣ чӣ қадар ҳастанд.

- Мутобиқи ҳисобгириҳо дар ҷумҳурӣ 212 истифодабарандаи воситаҳои радиоэлектронӣ ба ҳисоб гирифта шудааст. Аз миқдори умумии истифодабарандагони ВРЭ 162 адад ба шаҳри Душанбе ва шаҳру ноҳияҳои тобеи ҷумҳурӣ, 34 адад ба вилояти Суғд, 11 адад ба вилояти Хатлон ва 5 адад ба ВМКБ рост меояд,- илова намуд номбурда.

Ф. УМАРАЛӢ,
Р. ОДИНАЕВ, “ҶТ”