Дар нишасти матбуотии Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон иттилоъ дода шуд, ки ба ҳолати 1 январи соли 2026 шумораи умумии нафақагирон дар ҷумҳурӣ ба 877 ҳазору 206 нафар расидааст.

Ба иттилои Абдураҳмон Ҳалимзода дректори Агентӣи аз шумораи умумии нафақагирон 172 ҳазору 538 нафар нафақагирони маъюбиятдошта мебошанд. Аз ҷумла, 18 ҳазору 422 нафар ба гурӯҳи якуми маъюбӣ, 85 ҳазору 221 нафар ба гурӯҳи дуюм ва 33 ҳазору 514 нафар ба гурӯҳи сеюм шомиланд. Ҳамзамон, 35 ҳазору 381 нафар маъюбони аз овони кӯдакӣ то синни 18-сола ба қайд гирифта шудаанд, ки яке аз гурӯҳҳои осебпазиртарини ҷомеа ба ҳисоб мераванд.

Дар нишаст ҳамчунин зикр шуд, ки дар кишвар 1082 нафар кӯдакони ятими кулл ва 79 ҳазору 205 нафар кӯдакони нимятим мавҷуданд, ки онҳо низ аз механизмҳои гуногуни дастгирии иҷтимоӣ ва нафақавӣ баҳра мебаранд.

Тибқи маълумоти пешниҳодшуда, дар низоми нафақавӣ ҳамоно иштирокчиён ва маъюбони Ҷанги Бузурги Ватанӣ (солҳои 1941–1945) низ ҷойгоҳи хос доранд. Айни ҳол 13 нафар маъюбон ва иштирокчиёни мустақими ҷанг, инчунин 97 нафар иштирокчиёни ҷанг дар ақибгоҳ дар қайди мақомоти нафақавӣ қарор доранд.

Масъулини Агентӣ таъкид намуданд, ки таъмини саривақтӣ ва пурраи нафақа, такмили низоми суғуртаи иҷтимоӣ ва баланд бардоштани сатҳи ҳифзи иҷтимоии гурӯҳҳои ниёзманд аз самтҳои афзалиятноки фаъолияти ниҳод боқӣ мемонад. Ба гуфтаи онҳо, бо назардошти афзоиши шумораи нафақагирон, тадбирҳои иловагӣ ҷиҳати устувории молиявии низоми нафақавӣ ва беҳтарсозии хизматрасониҳо амалӣ карда мешаванд.

Яҳё МАҲМАДНАБИЕВ, “ҶТ”