Дар Ҷумҳурии Тоҷикистон барномаи мобилии “SOS”-ро роҳандозӣ намуданд, ки яке аз вазифаҳои муҳими он мусоидат намудан ба фаъолияти босамари инсон дар вазъияти фавқулода ба ҳисоб меравад.

Дар ин бора Кумитаи ҳолатҳои фавқулоддаи ва мудофиаи граждании назди Ҳукумати Ҷумҳурии Тоҷикистон иттилоъ медиҳад.

Бино ба иттилои манбаъ, барномаи мазкурро Кумитаи ҳолатҳои фавқулодда дар якҷоягӣ бо Ширкати миллии технологияҳои иттилоотию коммуникатсионӣ ба роҳ мондаанд.

Гуфта мешавад, ки замимаи мобилии SOS-ро ҳар як соҳиби смартфони муосир дар асоси системаҳои омили Android ва IOS насб карда метавонад.

- Ба корбарони барнома дигар лозим нест, ки дар ҳолатҳои фавқулодда ба саволҳои худ дар сайтҳои ҷустуҷӯ ҷавоб ҷӯянд, онҳо ҳамеша дар дастанд. Маълумоте, ки дар маҳсулоти нармафзор мавҷуд аст, ба шумо кумак мекунад, ки дар ҳолатҳои душвор тасмим бигиред,- омадааст дар хабар.

Ҳамзамон, зикр гардид, ки замимаи мобилии SOS як роҳи ҳалли осони мушкил барои беҳтар кардани бехатарӣ ва омодагӣ ба ҳолатҳои фавқулодда аст.