Вазорати фарҳанги Ҷумҳурии Тоҷикистон дар масъалаи иловаи банди қонун дар мавриди сафарҳо ва барномаҳои консертии ҳунармандон гуфт, ки ҳадаф аз он танҳо ба расмият даровардан аст.

Ин нуктаро Обид Назариён, муовини якуми вазири фарҳанги Ҷумҳурии Тоҷикистон 29-уми январ зимни нишасти хабарии ин ниҳод баён намуд.

Ӯ таъкид кард, ки ягона чизи муҳим ин мувофиқа кардан бо Вазорати фарҳанг аст. Ин гуна талаботҳо натанҳо дар Тоҷикистон, балки дар дигар кишварҳои дунё низ вуҷуд дорад.

- Дар тамоми ҷаҳон қоидаву қонунҳои муайян ҳастанд, ки ин гуна корҳоро ба сомон мерасонанд. Меҳмони махсус ташриф оварад, ҳатман бояд бо мақомотҳои марбута мувофиқа кунад. Дар мадди аввал Вазорати корҳои хориҷӣ моро аз омадани меҳмонон ва гузаронидани чорабиниҳои фарҳангӣ хабардор мекунад. Вазорати фарҳанг салоҳиятдор аст, хабардор бошад, ки чӣ гуна чорабинии фарҳангӣ дар кишвар гузаронида мешавад, - гуфт Обид Назариён.

Ёдовар мешавем, ки чанде қабл ба Қонуни нави фарҳанги Ҷумҳурии Тоҷикистон тағйирот ворид карда шуд, ки тибқи он аз ин ба баъд сафарҳои дохиливу хориҷии ҳунармандони тоҷик ва барномаи ҳунарии онҳо бояд бо Вазорати фарҳанг ҳамоҳанг карда шавад.

Гуфта мешавад, ки ҳадаф аз ин, муаррифии арзандаи фарҳанги кишвар аст. Маҷлиси намояндагони Маҷлиси Олии Ҷумҳурии Тоҷикистон тарҳи нави Қонун дар бораи фарҳангро охири соли гузашта тасвиб кард ва он аз рӯзи 18-уми январ расман ҳукми иҷро гирифт.