31-уми октябр дар Вазорати молияи кишвар бо иштироки намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон таҳти унвони “Тарбияи ватандӯстии шаҳрвандон-омили таҳкими пояҳои давлатдории миллӣ” ҳамоиш баргузор гардид.

Ҳамоиш баҳри татбиқи Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” доир шуда, дар он перомуни ватандӯстии шаҳрвандон суханрониҳо сурат гирифт.

Таъкид шуд, ки ҷавонон ҳамеша зери таваҷҷуҳи Пешвои миллат ва Ҳукумати кишвар қарор доранд ва нисбат ба ин қишри ҷомеа ҳамеша тадбирҳои зарурӣ амалӣ карда мешаванд. Таъсиси Стипендияи президентӣ ва Ҷоизаи давлатии ба номи Исмоили Сомонӣ барои олимони ҷавон аз иқдомҳои хуб дар ин самт ба ҳисоб меравад.

Дар идома вобаста ба зарурати қабули қонуни мазкур, ҳадаф ва самтҳои тарбияи ватандӯстӣ, баланд бардоштани ҳуввияти миллӣ ва тарбия намудани ҷавонон дар руҳияи ватандӯстӣ ибрози назар карда шуд.

Дар фарҷоми ҳамоиш барои фаъолияти судманд ба чанде аз кормандони Вазорати молия Сипосномаи Кумитаи кор бо ҷавонон ва варзиши назди Ҳукумати кишвар супорида шуд.

Г. КАРИМОВА, “ҶТ”