Хонандаест оромтабиат, вале кунҷову зирак. Наврасест дар ҳоли рушду камолёбӣ ва зиёданамоӣ дониш аз фанҳои дақиқ. Ҳанӯз аз синфи сеюм ба математика муҳаббат ва шавқ пайдо намуду то ҳол онро меомӯзад ва донишҳои навро барои худ кашф месозад.

Ин таваҷҷуҳ ва кунҷкобӣ аз ҳамон айём аз чашми волидон дур намонд. Волидон баробари машғулиятҳои дарсӣ, ҳамчунин ӯро иловагӣ ба назди муаллимон гузоштанд. Ва ӯ ҳам шуруъ кард ба омӯзиши бештари ин фанну ҳамоно шавқаш бештар гашт.
“Ӯ ба фанни математика таваҷҷуҳи махсус дошта, қобилияти баланди таҳлилӣ ва фикрронии мантиқӣ дорад. Дар иҷрои масъалаҳои душвор мустақилият нишон дода, донишашро дар амал хуб истифода мебарад. Дар дарсҳо фаъол буда, пайваста барои баланд бардоштани сатҳи дониши худ кӯшиш менамояд”, - мегӯяд устодаш.

Ҳамчунин, ӯро чун навраси худомӯз ва ташаббускор ном мебаранд. Берун аз барномаи дарсӣ низ мутолиа мекунад ва барои олимпиадаҳо мустақилона омодагӣ мебинад. Ӯ масъулиятшинос буда, дар шароити рақобат оромона фикр карда, қарорҳои дуруст қабул мекунад. Маҳз ҳамин сифатҳо ӯро аз дигар хонандагон фарқ мекунонад ва ба даст овардани натиҷаҳои баланд дар олимпиадаҳоро барояш имконпазир мегардонад.

Қаҳрамони мо иштирокчии фаъ- оли озмуну олимпиадаҳои сатҳи ҷумҳуриявӣ, мисли ғолиби ҷойи аввал дар Олимпиадаҳои фаннӣ дар синфи шашум, ҳаштум ва даҳум, “Илм-фурӯғи маърифат” аз рӯи номинатсияи математика сазовори мақоми аввал дар соли 2025, ғолиби ҷойи аввал дар Олимпиадаи фаннии аз тарафи Донишгоҳи байналмилалии сайёҳӣ ва соҳибкории Тоҷикистон дар соли 2025 роҳандозигашта мебошад. Инчунин, шумораи олимпиадаҳои хориҷааш ҳам хело зиёданд.

- Берун аз кишвар дар олимпиадаҳои зиёде ширкат кардаам. Аз ҷумла, Олимпиадаи байналмилалии наврасон аз фанни математикаи “JBMO-2023” дар Албания мақоми 3 ва соли 2024 дар Туркия ҷойи 2, Олимпиадаи байналмилалии “IMC-2024” дар Ҳиндустон ғолиби ҷойи 3, Олимпиадаи байналмилалии “Al-Khwarazmi” худи ҳамон сол дар Ҷумҳурии Узбекистон сазовори ҷойи аввал гардида, ҳамзамон дар соли 2025 дар Олимпиадаи 3-юмин Лагери тобис-тонаи байналмилалии математика “IMSC”-и Чин ва “IzhO-2025”-и Ҷумҳурии Қазоқистон ғолиби ҷойи сеюм гаштаам. Ҳамаи онҳо таҷриба ва хотироти зиёдеро бо худ дош-танд, ки ҳаргиз фаромӯшашон нахоҳам кард, - ёдрас мешавад қаҳрамони мо.

Аммо ин ҳама дастовардҳои ахири ӯ нест, балки шумораи онҳо ҳамчунон дар ҳоли афзоиш аст. Ӯ аз 10 то 15 январи соли ҷорӣ дар Олимпиадаи XXII байналмилалии Жаутиков аз фанҳои математика, физика ва информатика “IzhO-2026”-и шаҳри Алматои Ҷумҳурии Қазоқистон ширкат карда, соҳиби медали биринҷии мусобиқаи мазкур гардид.

Мо атрофи Меҳрубон Юсупов, хонандаи синфи 11-и Муассисаи давлатии таълимии “Литсейи президентӣ барои хонандагони болаёқат” дар ноҳияи Синои шаҳри Душанбе ҳарф мезанем, ки давоми ду соли ахир барандаи дукаратаи медали биринҷӣ дар Олимпиадаи байналмилалии IzhO-и Қазоқистон мебошад.

“Аз Ҷумҳурии Тоҷикистон дар он 4 даста, иборат аз 28 хонанда иштирок намуд. Мусобиқаи мазкур миёни 16 давлат ва бо 731 иштироккунанда баргузор гардида, дар натиҷа дастаҳои мо сазовори 7 медал гашт, ки яке аз медалҳои фанни математика азони ман буд. Аз ин дастовардам хушҳолам, зеро тули се моҳ барои он тайёрӣ дида будам. Пеш аз оғози олимпиада каме маро ҳаяҷон фаро гирифта буд, вале хушбахтона тавонистам сазовори яке аз медалҳои мусобиқа шавам, ки он нишоне аз натиҷаи заҳматҳои ҳамарӯзаам аст”, - таъкид намуд Меҳрубон.

Устодаш Ҷонибек Баротзода тули шаш сол мешавад, ки ӯро барои олимпиадаҳои гуногун омода мекунад. Ӯ зикр менамояд, ки то ошноӣ бо шогирдаш хонадагони зиёдеро дида буд, вале то он замон хонандаеро баробар ба лаёқати ӯ ва ҳама супоришҳоро ба пуррагиву беғалат иҷро мекардаро надида буд.

Вай дар идомаи суҳбат қайд намуд: “Ҳар як ғолибияти ӯ барои литсей як таърихи нав аст. Зеро то замони ӯ мо фақат дар олимпиадаҳои ҷумҳуриявӣ ва олимпиадаҳои байналмилалии сатҳи миёна ва баланд ҷой мегирифтем. Аз замони Меҳрубон сар карда, қариб дар 10 олимпиадаи сатҳи ҷаҳонӣ ва сатҳи олӣ мувваффақ шудаем, ки дас-товарди беҳтарини муассиса ба ҳисоб меравад. Баробари тамоми дастовардҳои то ин замон соҳиб гаштааш, ҳамзамон ӯ соли 2025 дар Олимпиадаи байналмилалии “IMO”-и Австралия аз математика ҷойи ифтихориро соҳиб шуд”.

Инчунин, ин устод аз иродаи қавии шогирдаш васф карда, иброз медорад, ки ӯ ҳангоми дучор шудан ба масъалаҳои хеле душвор аз кӯшиш даст намекашад.

“Масъулиятшиносӣ ва худназоратии баланд дошта, омодагиро бо нақша ва тартиби муайян пеш мебарад. Ҳар мисолу масъаларо амиқ омӯхта ва роҳҳои гуногуни ҳалро бо ҳам муқоиса мекунад. Вай мустақилона маводи иловагӣ меомӯзад ва иштибоҳои худро таҳлил намуда, аз онҳо хулоса мебарорад. Интизом ва масъулияти шахсӣ ба ӯ имкон дод, ки дар раванди омодагӣ барои ҳар озмуну олимпиада пешравӣ нишон диҳад”, - гуфт номбурда.

Ҷонибек Баротзода, ҳамчунин ба хонандагони наврас муроҷиат карда, қайд намуд, ки: “Хонандагон бояд аз монеаҳои дар пеш будаашон ҳеҷ вақт наҳаросанд ва ҳамавақт ба пеш ҳаракат кунанд. Дар баробари дарсҳои мактабӣ, ҳамзамон аз маводҳои иловагӣ ҳам истифода баранд ва дониши худро аз фанни дӯстдоштаашон ҳамаррӯза такмил диҳанд. Ҳам дар мактаб ва ҳам дар хона ба омӯзиш машғул бошанд, то барои расидан ба мақсадҳои гузоштаи худ коре карда бошанд”.

Волидонаш зимни суҳбат зикр доштанд, ки фарзандашон пеш аз анҷоми ҳар коре бо онҳо маслиҳат карда, баъдан бо назардошти фикру падару модари худ ба хулосаи ниҳоӣ меояд. Зимнан, онҳо низ аз масъулиятшиносии ӯ ёдрас шуданд.
Меҳрубон мегӯяд, ки математика аз шахс ҳам истеъдод ва ҳам меҳнати доимии ҳаррӯзаро талаб мекунад ва худи ӯ ҳар рӯз аз 4 то 6 соати вақташро барои ҳал намудани масъалаҳои гуногуни математикӣ истифода мебарад.

Қаҳрамони мо дар фарҷом аз нақшаҳои ояндаи худ ёдрас шуд ва гуфт мехоҳад, ки таҳсилро дар хориҷ аз кишвар идома дода, чун кадри босавод ба кишвар баргардад.

Гулафшон КАРИМОВА,“ҶТ”