ҶОМЕА
Чоршанбе 17 Июл 2024 07:02
9473
Дар маркази маъмурии Вилояти Мухтори Кӯҳистони Бадахшон, шаҳри Хоруғ бо иштироки раиси ВМКБ Мирзонабот Алишер Худобердӣ, Ризо Назарзода, раиси шаҳри Хоруғ, намояндагони сохторҳои қудратӣ, идораву муассисаҳои вилоятӣ ва шаҳрӣ, ҷавонону наврасон, бонувону калонсолон ва дигар қишрҳои ҷомеа Дави миллӣ ва марафони велосипедронӣ баргузор гардид.

Пеш аз оғози чорабиниҳои варзишӣ Ризо Назарзода, раиси шаҳри Хоруғ иштирокчиёнро ба муносибати Рӯзи ҷавонон табрик намуда, аз таваҷҷуҳи рӯзафзуни Ҳукумати Ҷумҳурии Тоҷикистон, бахусус, Пешвои муаззами миллат муҳтарам Эмомалӣ Раҳмон ва роҳбарияти вилоят нисбати таҳкими тарзи ҳаёти солим ва оммавияти варзиш ҳарф зад.

Таъкид гардид, ки давоми чанд соли охир дар марказ ва ноҳияҳои вилоят садҳо иншооти варзишӣ бунёду азнавсозӣ шуда, дар ин раванд корҳои сохтмонӣ идома доранд.

Мирзонабот Алишер Худобердӣ, раиси ВМКБ зимни баромади худ махсус таъкид кард, ки ҳамасола дар кишвари мо ба хотири оммавӣ намудани варзиш ва тарғиби тарзи ҳаёти солим дар байни ҳамаи қишрҳои ҷомеа якшанбеи сеюми моҳи май Дави миллӣ баргузор мегардад ва дар сатҳи баланд доир намудани он ба ҳукми анъана даромадааст.

- Теъдоди хоҳишмандону иштирокдорони Дави миллӣ сол аз сол зиёд гардида, ин иқдом боиси хушнудии ҳамаи мост. Солҳои охир соҳаи варзиш хеле рушд ёфта, варзишгарони вилоят дар мусобиқаҳои сатҳи ҷумҳурӣ, минтақавӣ ва байналмилалӣ фаъолона иштирок намуда, натиҷаҳои назаррасро ба даст оварда истодаанд ва ин амали онҳо мояи ифтихору сарфарозии аҳли вилоят аст. Насли ҷавонро мебояд, ки бо дониши амиқ, ҷаҳонбинии васею андешаи мустақил ва масъулияти баланди шаҳрвандӣ қарзи фарзандии хешро дар назди Ватан эҳсос намуда, ҷомеаи моро ба сӯи ободию пирӯзиҳои нав раҳнамун созанд, - гуфт раиси ВМКБ.

Сипас Дави миллӣ ва марафони велосипедронӣ то майдони Ғалаба давом карда, ҳамаи табақаҳои ҷомеа дар чорабиниҳои варзишии мазкур фаъолона ширкат намуданд.

Эзоҳи худро нависед



Рамзҳо дар расм