Дар соли 2024 Оиннома ва сохтори нави идоракунии Донишгоҳи сайёҳӣ ва соҳибкории Тоҷикистон тасдиқ гардида, тибқи он дар сохтори таркибии донишгоҳ 2 Пажӯҳишгоҳи илмию тадқиқотӣ, 3 Институти таълимӣ, 10 Марказ ва дигар воҳидҳои сохтории вобаста ба меъёрҳои ҷаҳонии муассисаҳои таҳсилоти олии касбӣ таъсис дода шуданд.


Дар ин бора санаи 5 феврали соли 2024 ректори донишгоҳ Асрорзода Убайдулло зимни нишасти хабарӣ иттилоъ дод.

Тавре ректори донишгоҳ қайд намуд, мувофиқи Стратегияи миллии рушди маорифи Ҳукумати Тоҷикистон барои давраи то соли 2030 бо қарори Ҳукумати Ҷумҳурии Тоҷикистон аз 29 июни соли 2024 донишкадаҳои байналмилалии назди Донишгоҳи байналмилалии сайёҳӣ ва соҳибкории Тоҷикистон дар шаҳрҳои Левакант, Хуҷанд ва ноҳияи Данғара таъсис дода шуданд.

Ҳамчунин дар ин давра Оиннома ва сохтори Институтҳои илмию тадқиқотӣ ва Маркази ҷумҳуриявии такмили ихтисоси кормандони соҳаҳои сайёҳӣ ва хизматрасонӣ тасдиқ карда шуда, муассисаҳои давлатии таълимии “Литсейи касбии дӯзандагии шаҳри Душанбе” ва “Литсейи касбии хизмат ва туризми шаҳри Душанбе” ба ихтиёри Донишгоҳи байналмилалии сайёҳӣ ва соҳибкории Тоҷикистон гузаронида шуданд.

Инчунин таъкид гардид, ки барномаҳои таҳсилотии донишгоҳ дар доираи Иҷозатнома оид ба пешбурди фаъолияти таълимӣ то ба 96 адад расонида шуда, боиси зиёд шудани нақшаи қабул ва афзоиш ёфтани теъдоди омӯзгорон гардид.

Соли 2024 дар донишгоҳ теъдоди кафедраҳо аз 19 адад ба 24 адад зиёд карда шуда, ҳайати илмию омӯзгории донишгоҳ нисбат ба соли 2023 224 нафар (ё 172 воҳиди корӣ) зиёд гардид.

Шаҳло ЭШОНОВА, “ҶТ”