Таҳлили муқоисавии натиҷаи имтиҳони хатми давлатӣ нишон дод, ки дар соли таҳсили 2018-2019 хатмкунандагони Донишгоҳи давлатии тиббии Тоҷикистон ба номи Абӯалӣ ибни Сино 99,7% донишгоҳро бомуваффақият хатм намуданд, ки сифати таълими хатмкунандагон дар сатҳи баланд қарор дошта, 75,8%-ро ташкил медиҳад.

Гулзода Маҳмадшоҳ Қурбоналӣ, ректори Донишгоҳи давлатии тиббии Тоҷикистон ба номи Абӯалӣ ибни Сино, ин нуктаро имрӯз 30 июл, зимни нишасти хабарӣ баён намуда, ба суоли он ки “Чаро аз шумораи умумии хатмкунандагони донишгоҳ, ки 1556 нафарро ташкил медиҳад, танҳо 65 нафар ба гирифтани дипломи аъло даст ёфтаанд, оё ин кам нест?” гуфт: “Илми тиб илмест, ки мушкилот дорад ва на ҳама ба ин мушкилот тоқатовар аст. Он 65 донишҷӯе, ки донишгоҳро бо дипломи аъло хатм кардаанд, ки 4,2% -ро ташкил медиҳад, меъёри хуби донишгоҳист. Ин нишони он аст, ки дар ҳақиқат ҳамин 65 нафар бо маҳорати хуб донишгоҳро хатм кардаанд ва бо дипломи аъло сарфароз гардидаанд”.

Дар идома вобаста ба ихтироот дар донишгоҳ гуфта шуд, ки ихтироот кори осон набуда, барои ихтироъ кардан, чандин солҳо бояд мувофиқи шартҳои ихтироот фаъолият бурд. Дар шаш моҳи аввали соли ҷорӣ аз тарафи олимони донишгоҳ 15 ихтироъ пешниҳод карда шуда, ин шумора кам нест. Ва ин ихтироотҳо нисбати ихтирооти ҳамин давраи соли гузашта панҷ-даҳ маротиба хубтару беҳтар аст.