Имрӯз бахшида ба Рӯзи матбуот дар факултети журналистикаи Донишгоҳи миллии Тоҷикистон бо ташаббуси кафедраи матбуоти ин факултет таҳти унвони “Дирӯз, имрӯз ва фардои матбуоти даврӣ” маҳфили идона баргузор гардид.

Дар маҳфил профессор Хушвахтзода Қобилҷон, ректори ДМТ, Зиннатуллоҳ Исмоилзода, раиси ИЖТ, Қурбоналӣ Раҳмонзода, сармуҳаррири рӯзномаи “Ҷумҳурият”, Шодихони Назар, сармуҳаррири рӯзномаи “Ҷавонони Тоҷикистон”, Обидҷон Саидзода, директори радиои Тоҷикистон, Хуршеди Атоулло, директори МТЖТ ва дигар рӯзноманигорону аҳли қалам иштирок ва суханронӣ карданд.

Зимни баргузории чорабинӣ масъалаҳои муҳими матбуоти даврӣ мавриди баҳсу баррасӣ қарор гирифта, гуфта шуд, ки матбуот ё расонаҳои чопӣ ҳамчун классикаи журналистика бо вуҷуди ҳама фанновариҳову тараққӣ кардани технология пойбарҷо хоҳад монд ва дар рушди башарӣ ҳамчун оинаи ҳаманамо нақши созгори худро хоҳад гузошт.

Дар идома аз ҷониби Шодихони Назар, сармуҳаррири рӯзномаи “Ҷавонони Тоҷикистон” ба Хушвахтзода Қобилҷон, ректори ДМТ як нусха китоби “Иҷлосияи XVI Шурои Олӣ ва эҳёи худшиносии миллӣ”, ки бахшида ба 30-юмин солгарди Иҷлосияи XVI Шурои Олии Ҷумҳурии Тоҷикистон аз ҷониби рӯзномаи “Ҷавонони Тоҷикистон” таҳия гардида буд, ҳамчунин як нусха рӯзномаи ҷашнӣ ва рамзии 70-саҳифагӣ, ки ба муносибати Рӯзи забон чоп шуда буд, тақдим гардид.

Дар охири чорабинӣ ба як қатор сармуҳаррирон ва фаъолони ҷомеаи журналистӣ, аз ҷумла Хуршед Ховарӣ, ҷонишини сармуҳаррири рӯзномаи “Ҷавонони Тоҷикистон” Ифтихорномаи Донишгоҳи миллии Тоҷикистон тақдим шуд.