Вобаста ба талаботи банди 79 - и Низомномаи низоми кредитии таҳсилот дар муассисаҳои таҳсилоти олии касбии Ҷумҳурии Тоҷикистон шуруъ аз нимсолаи дуюми соли таҳсили 2021-2022 кабули имтиҳонҳои ниҳоӣ вобаста ба талаботи барномаҳои таълимии фан дар шакли шифоҳӣ ва хаттӣ ба роҳ монда шуд.

Ин нуктаро Қобилҷон Хушвахтзода, ректори Донишгоҳи миллии Тоҷикистон дар нишасти матбуотӣ иброз дошт.

Номбурда афзуд, ки вобаста ба талаботи мазкур қабули имтиҳонҳои ниҳоии сесияи нимсолаи дуюм дар Донишгоҳи миллии Тоҷикистон ба таври шифоҳӣ ва тестӣ сурат гирифт. Баъд аз ҷамъбасти сесияи имтиҳонӣ дараҷаи азхудкунӣ дар шакли шифоҳии қабули имтиҳонҳо ба 73% ва дар шакли тестии қабули имтиҳонҳо натиҷаи азхудкунӣ ба 68,2% баробар гардид.
Ректори донишгоҳ иқдоми Вазорати маориф ва илми Ҷумҳурии Тоҷикистонро дар ин самт хуб арзёбӣ намуда, гуфт:

- Тартиби мазкур бисёр ҳам хуб буда, дар як муддати кӯтоҳ мақому манзалати омӯзгорро баланд бардошт ва донишҷӯён имконияти озодона баён намудани фикри хешро дар назди устод пайдо карданд. Қабули имтиҳонҳо дар шакли шифоҳӣ чӣ аз ҷониби омӯзгорон ва чӣ аз ҷониби донишҷӯён як дилгармиии тозаеро ба вуҷуд овард. Таъкид бояд кард, ки қабули имтиҳонҳо дар ин шакл гузариш ба низоми анъанавӣ набуда, танҳо дар доираи талаботи низоми кредитии таҳсилот мебошад.