Бо вуҷуди мушкилиҳои молиявӣ ва буҳронҳои иқтисодӣ аз оғози соли 2021 маоши кормандону омӯзгорони ДМТ дар ҳаҷми 10% баланд бардошта шуд. Ҳамзамон, дар баробари пешниҳоде, ки Президенти кишвар муҳтарам Эмомалӣ Раҳмон зимни ироаи Паёми навбатӣ таъкид доштанд, яъне зиёд шудани музди меҳнат дар ҳаҷми 20% аз 1-июли соли 2022, илова бар ин, бо пешниҳоди ректори донишгоҳ шурӯъ аз 1-уми сентябри соли 2022 маоши омӯзгорон дар ҳаҷми 10%-и дигар баланд бардошта мешавад.

Дар ин бора Қобилҷон Хушвахтзода, ректори Донишгоҳи миллии Тоҷикистон 31 январ зимни нишасти матбуотӣ иттилоъ дод.

Инчунин қайд карда шуд, ки бо мақсади дарёфти истеъдодҳои наврасу ҷавонон ва дар амал татбиқ намудани Амри Пешвои миллат, донишҷӯёну магистрони Донишгоҳи миллии Тоҷикистон дар даври ҷумҳуриявии озмуни ҷумҳуриявии “Илм - фурӯғи маърифат” иштирок намуда, соҳиби 15 ҷой (5 ҷойи 1, 4 ҷойи 2, 5 ҷойи 3 ва як ифтихорнома) ва дар даври ҷумҳуриявии озмуни ҷумҳуриявии “Фурӯғи субҳи доноӣ китоб аст” соҳиби 6 ҷой (2 ҷойи 1, 1 ҷойи 2 ва 3 ҷойи 3) гардиданд.