Кумитаи забон ва истилоҳоти назди Ҳукумати Ҷумҳурии Тоҷикистон бо мақсади назорат ва муайян намудани мутобиқати забони давлатӣ эълону рекламаи 456 адад ангораҳои соҳибкорон, ташкилот ва муассисаҳои рекламаистеҳсолкунандаро дар ҳамкорӣ бо Муассисаи давлатии “Рекламаи берунӣ ва ороиши шаҳри Душанбе” мавриди омӯзиш ва баррасӣ қарор додааст.

Дар ин бора 6 феврал Олимҷон Муҳаммадҷонзода, раиси Кумитаи забон ва истилоҳоти назди Ҳукумати Ҷумҳурии Тоҷикистон зимни нишасти матбуотӣ хабар дод.

Номбурда дар шарҳи ин гуфтаи хеш илова кард, ки дар пайи омӯзишу баррасии мазкур рекламаҳоро ба талаботи Қонун мутобиқ намуда, эълону рекламаҳои ғайримеъёрӣ ислоҳ карда шуданд.

Дар идома гуфта шуд, ки соли 2023 аз ҷониби судҳои ҷумҳуриявӣ вобаста ба риоя нагардидани талаботи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” 35 парвандаи ҳуқуқвайронкунии маъмурӣ баррасӣ шуда, ба шахсони ҳуқуқвайронкунанда ҷарима ба андозаи 30684 сомонӣ таъин гардид, ки аз ин маблағ 26604 сомонӣ ба фоидаи давлат рӯёнида шудааст.