Ҳар сол дар арафаи ҷашни Истиқлолияти давлатӣ аз ҷониби Ҳукумати кишвар, бахусус Пешвои миллат, Президенти ҷумҳурӣ, муҳтарам Эмомалӣ Раҳмон ба нафароне, ки дар беҳдошти ҳаёти иҷтимоиву иқтисодӣ саҳми арзанда мегузоранд, қадрдонӣ мешаванд.

Ду корманди Кумитаи ҷавонон, варзиш ва сайёҳӣ - Назарзода Ризо, муовини раиси кумита ва Носир Бозоров, сардори Раёсати тарбияи ҷисмонӣ ва инкишофи варзиши кумита бо “Ифтихорнома”-и Ҷумҳурии Тоҷикистон қадрдонӣ шуданд.

Ҷоизаҳоро Сайфиддин Давлатзода, сардори Раёсати илм ва маърифати Дастгоҳи иҷроияи Президенти мамлакат супорид.

С. Давлатзода иброз дошт, ки яке аз корҳои арзандаи Кумитаи ҷавонон, варзиш ва сайёҳӣ дар арафаи таҷлили 25-солагии Истиқлолияти давлатии кишвар ғалабаи Дилшод Назаров дар Олимпиадаи Рио-де-Жанейро буд, ки ҳама аз он меболем. Дар мадди аввал ҷавонон инро дида, кӯшиш менамоянд, то мисли ин қаҳрамони Бозиҳои олимпӣ бошанду парчамбардори Ватан.

Гуфта шуд, фаъолияти хизматчиёни давлатӣ ҳеҷ гоҳ аз назари Давлату Ҳукумати кишвар дур намемонад.