2 декабр дар Муассисаи таҳсилоти миёнаи умумии №19 шаҳри Душанбе ҳамоиши тарбиявӣ таҳти унвони “Омӯзиши арзишҳои олимпӣ” баргузор гардид, ки ҳадафаш таҳкими донишҳои олимпӣ дар байни хонандагон, боло бурдани маърифати варзишӣ ва тарғиби тарзи ҳаёти солим мебошад.

Дар чорабинӣ шахсиятҳои барҷастаи соҳаи варзиш ва Олимпии кишвар ширкат варзиданд. Аз ҷумла, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода, муовини Президенти Кумитаи миллии олимпӣ Дилшод Назаров, котиби генералии КМОТ Муҳаммадшо Абдуллозода, намояндаи Кумитаи байналмилалии олимпӣ Анфиса Касянова ва Президенти Кумитаи миллии паралимпӣ Маҳмуд Амонзода бо суханрониҳои худ ба аҳли нишаст паём расониданд.

Дар рафти суханрониҳо таъкид гардид, ки солҳои соҳибистиқлолӣ барои рушди варзиш дар Тоҷикистон марҳилаи нав оғоз шуд. Ба шарофати сиёсати варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инфрасохтори варзишӣ дар саросари кишвар ба таври бесобиқа таҷдид ва навсозӣ гардид. Ин амал ба рушди варзишгарони тоҷик ва баланд шудани нуфузи кишвар дар арсаи байналмилалӣ такони ҷиддӣ бахшид. Зикр шуд, ки танҳо дар соли 2025 варзишгарони тоҷик дар мусобиқаҳои гуногуни байналмилалӣ 480 медал ба даст овардаанд, ки нишондиҳандаи пешравии назарраси соҳа мебошад.

Намояндаи Кумитаи байналмилалии олимпӣ Анфиса Касянова иброз дошт, ки Душанбе дар солҳои охир ҳамчун як маркази фаъоли рушди варзиш дар минтақа муаррифӣ мешавад. Ба гуфтаи ӯ иқдомҳои Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ барои сохтмони иншооти муосири варзишӣ ва фароҳам овардани имкониятҳои фарох барои ҷавонон ва варзишгарон мусоидат намудаанд. “Пойтахти Тоҷикистон имрӯз ба шаҳре табдил ёфтааст, ки варзишро на танҳо дастгирӣ, балки тарғиб мекунад”, - таъкид намуд Касянова.

Дар анҷоми ҳамоиш зикр шуд, ки Ҳаракати олимпӣ дар Тоҷикистон на танҳо ба рушди варзишгарони ҷавон мусоидат мекунад, балки ҳамчун мактаби ҳақиқии тарбия хизмат мекунад. Ин ҳаракат ҷавононро ба риояи принсипҳои одоби варзишӣ, эҳтироми ҳамдигар, ҳамкорӣ ва сулҳҷӯӣ ҳидоят карда, ба онҳо меомӯзад, ки муваффақият танҳо бо меҳнат, интизом ва руҳияи дастаҷамъӣ ба даст меояд.

Чорабинӣ бо пешниҳоди барномаҳои маърифатӣ ва мулоқоти бевоситаи хонандагон бо чеҳраҳои маъруфи варзишӣ анҷом ёфт, ки ин барои боло бурдани шавқу ҳаваси насли наврас ба варзиш ва зиндагии солим заминаи нав фароҳам меорад.

Яҳё МАҲМАДНАБИЕВ, “ҶТ”