12-уми декабр давраи дигари иқдомҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо як қатор мақомоти дахлдори давлатӣ, гузаронидани рейдҳо дар кӯчаву хиёбонҳои шаҳр барои чораандешӣ кардан нисбат ба занону духтарони ба амалҳои номатлуб дастзананда оғоз гардид. Ин давра дар 4 ноҳияи шаҳри Душанбе рейди муштарак гузаронида шуд.

Санҷиш аз соати 20:00 оғоз гашта, то соати 23:00 идома ёфт. Дар рафти санҷиш дар ҳеҷ яке аз кӯчаву хиёбонои пойтахт ҳолатҳои ҳузур доштани занҳои сабукпо ба чашм нарасид.

Ҳайати гурӯҳи корӣ ба хулосае омаданд, ки кори мақомоти дахлдор дар ин самт натиҷаи дилхоҳ додааст.

Мавриди зикр аст, ки ин иқдомот сар аз рӯзи 3-юми роҳандозӣ шуда, то ин вақт аз тарафи Кумитаи кор бо ҷавонон ва варзиш дар ҳамкорӣ бо як қатор мақомоти дахлдори давлатӣ барои пешгирии пош хӯрдани оилаҳо, махсусан оилаҳои ҷавон ва пешгирии ҷалбсозию даст задани ҷавондухтарону занон ба кирдорҳои ношоиставу номатлуб миёни донишҷӯдухтароне, ки дар хобгоҳҳои донишгоҳу донишкадаҳо ҳудуди шаҳри Душанбе зиндагонӣ мекунанд, мулоқоту фаҳмондадиҳиҳо гузаронида шуда буд.