Имрӯз дар доираи нақша – чорабиниҳои муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Вазорати фарҳанги Ҷумҳурии Тоҷикистон ҳамоиши ҷавонони соҳаи фарҳанг бахшида ба Рӯзи Парчам доир шуд.

Дар ин бора маркази таҳлил ва иттилооти Кумитаи кор бо ҷавонон ва варзиш хабар додааст.

Бино ба иттилои манбаъ, пеш аз оғози ҳамоиш бахшида Рӯзи Парчами давлатии Ҷумҳурии Тоҷикистон бо иштироки роҳбарияту кормандони сохтор ва зерсохтори Кумита, Вазорат ва шаҳри Душанбе дар атрофи Муассисаи давлатии “Боғи Куруши Кабир” роҳпаймоии идона баргузор гардид.

Нахуст ҳайати меҳмонон аз дастовардҳои ҷавонони соҳаи фарҳанги кишвар, ки дар даромадгоҳи Муассисаи давлатии "Театри давлатии академии опера ва балети ба номи С Айнӣ" ба намоиш гузошта шуда буд, дидан намуда, ба нақши фарҳангиён дар рушди арзишҳои фарҳангии кишвар баҳои баланд дода шуд.

Чорабинӣ таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Матлубахон Сатториён, вазири фарҳанги Ҷумҳурии Тоҷикистон ва Рустам Фақерзода, муовини раиси шаҳри Душанбе доир гардида, дар он намояндагони сохтор ва зерсохтори Вазорати фарҳанги Ҷумҳурии Тоҷикистон, кормандони Кумитаи кор бо ҷавонон ва варзиш ва ҷавонони фаъоли соҳаи фарҳанги кишвар иштирок намуданд.

Тибқи иттилоъ, раёсати чорабинӣ ҳозиринро ба истиқболи ҷашни Рӯзи Парчами давлатии Ҷумҳурии Тоҷикистон шодбош гуфта, дарҷ намуданд, ки рамзҳои давлатии Тоҷикистон дар тарбияи ватандӯстӣ ва ҳисси миллии ҳар як тоҷикистонӣ нақши муҳиму сазовор доранд ва барои ҳар шаҳрванди Тоҷикистони соҳибистиқлол боиси ифтихоранд. Бахусус, ҳангоми иҷрои Суруди миллӣ, зимни баланд бардоштани Парчами давлатии Ҷумҳурии Тоҷикистон дар ҷашну ҳамоишҳои пурнуфузу баландпояи байналмилалию ҷумҳуриявӣ, ҳамчунин дар мавриди ғалабаи варзишгарон дар мусобиқаҳои байналмилалӣ ғурур ва ҳисси миллиро баланд мебардоранд.

Раиси Кумита зимни суханронӣ нақши фарҳангиёни ҷавонро дар ҳифзи арзишҳои фарҳангӣ ва ташвиқи фарҳанги миллӣ баланд арзёбӣ намуда, зикр намуданд, ки фарҳанги миллӣ ташаккулдиҳандаи тарбияи ахлоқию эстетикии ҳар қавму миллат ба шумор рафта, дар баланд бардоштани ҳисси худшиносиву худогоҳӣ ва ватандӯстию маърифатпарварӣ, пешрафти кори таълиму тарбия дар байни ҷавонон нақши ҳалкунанда мебозад. Таълиму тарбия дар он сурат пойдор хоҳад монд, ки хусусиятҳои миллӣ дошта, нигаҳдори арзишҳои таърихии мо, равнақу ривоҷи худшиносӣ ва ифтихори миллӣ бошад. Яке аз қадамҳои устувор дар ин ҷода ташкил ва гузаронидани семинару конференсияҳои сатҳи баланд дар байни олимону коршиносон ва ҷавонони кишвар мебошад. Зеро ҷомеаи мо ба тарбияи насли дорои тафаккури созанда, чаҳонбиниву дониши муосир, зираку соҳибмаърифат ва ватанпараст ниёз дорад.

Дар идома таъкид гардид, ки омӯзиши фарҳанги миллӣ, тарғибу ташвиқи он яке аз масъулиятҳои асосии ҷавонон мебошад. Ҷавонон метавонанд бо ҳисси баланди худшиносию ватандӯстӣ дар ин ҷода саҳми намоён гузоранд. Дар вазъияте, ки ҷаҳонишавию бархӯрди тамаддунҳо ба авҷи аъло расидааст, лозим меояд, ки нақш ва мақоми ҷавонони соҳибмаърифат, боистеъдоду лаёқатманд ва дорои нангу номуси ватандории кишварро баланд бардошта дар замири ин қишри ояндасоз меҳри ватану ватандорӣ ва зиракии сиёсиро ҷой намуд.

Баъд аз табрику суханронӣ пеш аз оғози қисми фарҳангии чорабинӣ чанд нафар фаъолони соҳаи фарҳанги кишвар бо Сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон сарфароз гардонида шуданд.
Сипас, қисми фарҳангии чорабинӣ оғоз ёфта, дар он гурӯҳи ҳаваскорони ҷавон бо сурудҳои ҷазобу дилнишини ватандӯстӣ, рақсу оҳангҳои милливу классикӣ фазои чорабиниро идонаву мутантан намуданд.