Маҷмааи меъмории “Истиқлол”, ки 8-уми сентябри соли ҷорӣ бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ба истифода дода шуд, дар ошёнаи дуюми он Осорхонаи таърихии шаҳри Душанбе ба фаъолият оғоз намуд.

Осорхона мувофиқ ба талаботи муосири осорхонашиносӣ ва ороиши замонавӣ бино ёфтааст, ки он бозгӯи дирӯзу имрӯзи шаҳри Душанбе мебошад.
Дар осорхонаи мазкур нигораҳои гуногун, аксҳои таърихӣ аз ҳаёти шаҳр ва китобҳои гуногун доир ба шаҳри Душанбе ҷой дода шудаанд, ки ҳар яке аз таърихи мондагори пойтахти азизамон қисса мекунад.

Гӯшае, ки дар он китобҳо доир ба таърихи шаҳри Душанбе ва Душанбеи давраи истиқлолият гузошта шудааст, баёнгари дирӯзу имрӯзи Душанбе ва чӣ тавр ободу зебо гаштани он аст.

Яке аз чунин китобҳо, ки дар осорхонаи мазкур гузошта шудааст, ин китоби “Душанбе - ганҷе дар қалби Осиё”-и Муассисаи давлатии рӯзномаи “Ҷавонони Тоҷикистон” мебошад.

Китоби мазкур бахшида ба пойтахти фарҳангии ИДМ интихоб шудани шаҳри Душанбе дар соли 2021 дар доираи як озмуни ҷумҳуриявии МД рӯзномаи “Ҷавонони Тоҷикистон” дар якҷоягӣ бо Раёсати кор бо ҷавонон ва варзиши шаҳри Душанбе рӯйи чоп омада, он маҷмӯи мақолаву очеркҳоро дар бар мегирад.

Дар китоб баробари мақолаву очеркҳо, ҳамчунин расмҳои биноҳо ва сохтмонҳои боғу гулгаштҳо дар замони шӯравӣ, ҳамчунин давраи ҷанги шаҳрвандӣ, ободонию созандагӣ дар даврони соҳибистиқлолӣ инъикос гардидааст, ки бозгӯи давраҳои мухталифи шаҳри Душанбе мебошад.

Китоби мазкур дорои вижагии хос буда, он ҳамчун муаррификунандаи пойтахти азизамон барои ҳар нафар мебошад.