Дар доираи чорабиниҳои фарҳангӣ – фароғатӣ ва оммавию варзишӣ ба ифтихори таҷлили сазовори Рӯзи пойтахт, 20 апрел дар толори Кумитаи миллии олимпӣ конфронси илмӣ – назариявӣ таҳти унвони “Пойтахт- тараннумгари музаффариятҳои мо - ҷавонон ва варзишгарон” баргузор гардид.

Чорабинии мазкур аз тарафи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ташкил шуда, дар он намояндагони вазорату идораҳо, масъулини соҳаи кор бо ҷавонон ва варзиш ширкат намуданд.

Аҳтам Абдуллозода раиси Кумитаи кор бо ҷавонон ва варзиш иштирокчиён ва дар симои онҳо сокинони кишварро бо Рӯзи пойтахт табрику таҳният намуда, аз суханрониҳои Пешвои миллат, муҳтарам Эмомалӣ Раҳмон дар васфи пойтахт ёдовар шуда қайд намуд, ки “Пойтахти Тоҷикистон – шаҳри Душанбе оинаи таъриху зиндагии миллати тоҷик ва давлати тоҷикон аст”:

- Пойтахти азизамон шаҳри Душанбе, ки дар асл сутуни пойдории давлат ва симои аслии миллат ба ҳисоб меравад, яке аз пойтахтҳои ҷавонтарин дар ҷаҳон ба ҳисоб рафта, дунёи ҳамарӯзаи ҷавонони кишвар дар оғуши он гарму самимӣ ва рангину гуворо гардида истодааст, - гуфт А. Абдуллозода.

Дар рафти чорабинӣ ҳозирин доир ба мавзуъҳои “Пойтахт- тараннумгари музаффариятҳои мо –ҷавонон ва варзишгарон”, “Пойтахти Тоҷикистон – шаҳри Душанбе оинаи таъриху зиндагии миллати тоҷик ва давлати тоҷикон”, “Нақши пойтахт дар рушти соҳаи маориф ва илми Ҷумҳурии Тоҷикистон”, “Пойтахт – машъали фурӯзони шоирону нависандагон” ва “Пойтахт ва рушди ҳаракатҳои олимпӣ” маърӯзаҳо намуданд.

Ёдовар мешавем, ки бори нахуст бо ташаббуси Кумитаи кор бо ҷавонон ва варзиш ва сохторҳои маҳаллии он ба ифтихори таҷлили сазовори Рӯзи пойтахт санаи 21 апрел дар қаламрави кишвар зиёда аз 500 адад чорабиниҳои гуногуни фарҳангию маърифатӣ ва варзишӣ таҳти унвони “Пойтахт- тараннумгари музаффариятҳои мо - ҷавонон ва варзишгарон” доир мегардад.