Форуми байналмилалии “Душанбе - шаҳри имконоти рушди кӯдакон” бо маросими гулчамбаргузории меҳмонон дар пояи муҷассамаи Исмоили Сомонӣ ва Маҷмааи меъмории “Ваҳдати миллӣ ва эҳёи Тоҷикистон” оғоз гардид.

Форуми мазкур бо ибтикори Мақомоти иҷроияи ҳокимияти давлатии шахри Душанбе доир гардида, дар он намояндагони Дастгоҳи иҷроияи Президенти Ҷумҳурии Тоҷикистон, вазорату идораҳо, корпуси дипломатӣ, созмону ташкилотҳои байналмилалӣ, ташкилотҳои ҷамъиятӣ, раис ва котибони комиссия оид ба ҳуқуқи кӯдаки ВМКБ, Суғд, Хатлон, шаҳру ноҳияҳои тобеи марказ, роҳбарони муассисаҳои таҳсилоти миёна ва олии касбӣ, сохторҳои шаҳрӣ ва намояндагони ВАО иштирок намуданд.

Форум дар Муассисаи давлатии “Душанбе- Плаза” идома ёфта, филми кӯтоҳи “Душанбе- шаҳри имконоти рушди кӯдакон” ба ҳозирин намоиш дода шуд. Баъдан ба кори форум Муинӣ Мавсума Муинзода, муовини раиси шаҳри Душанбе расман ҳусни оғоз бахшид.

Муовини Сарвазири Ҷумҳурии Тоҷикистон, раиси Комиссияи назди Ҳукумати Ҷумҳурии Тоҷикистон оид ба ҳуқуқи кӯдак Азим Иброҳим зимни суханронии хеш меҳмононро хайрамақдам намуда, ба роҳбарияти шаҳри Душанбе барои баргузории чунин як форуми саривақтӣ миннатдорӣ баён намуд: “Мояи ифтихор аст, ки миёни 200 давлати дунё Тоҷикистон барои гузаронидани Конвенсияи ҳуқуқи кӯдак интихоб гардид. Миннатдории худро ба раиси шаҳри Душанбе муҳтарам Рустами Эмомалӣ мерасонам, ки ба ин масъалаи муҳим диққати ҷиддӣ доданд ва имрӯз тамоми паҳлуҳои ин конвенсия бо дастгирии раиси шаҳри Душанбе гузаронида мешавад. Давоми 30 соли фаъолияти Конфенсияи ҳуқуқи кӯдак ва 26 соле, ки дар Ҷумҳурии Тоҷикистон амал мекунад, дар саросари кишварамон шароитҳои мусоид барои кӯдакон фароҳам оварда шудааст. Тоҷикистон минбаъд низ хамчун аъзои ин конвенсия тамоми кӯшишҳоро ба харҷ медиҳад, то тамоми паҳлуҳои ҳуқуқи кӯдакон риоя гардад.”

Роҳбари намояндагии Хазинаи кӯдакони Созмони Милали Муттахид (ЮНИСЕФ) дар Ҷумҳурии Тоҷикистон Лучиано Калестини дар суханронии худ чунин иброз намуд: “Ҳамаи шуморо ба ин рӯзи фархунда табрик менамоям. Соли 1993 бо вуҷуди ҷанги шаҳрвандӣ Ҷумҳурии Тоҷикистон эътироф кард, ки ҳуқуқи кӯдаконро бояд таъмин намуд. Дар давоми 26 сол Тоҷикистон натанҳо ба конвенсия имзо гузошт, балки корҳоеро дар ин самт роҳандозӣ намуд, ки беназир аст. Мо пешравиҳои зиёдро мушоҳида намудем. Агар мо солҳои пешро ба ин рӯз муқоиса кунем, тағирот аз замин то осмон аст. Шумо имрӯз комилан як давлати дигарро барои кӯдакон сохтед. Давоми 26 соли фаъолияти конвенсияи мазкур фавти кӯдакон хеле поён рафтааст. Ман зиёда дар 10 давлати дунё таҷрибаи корӣ дорам, аммо таҷрибаеро, ки давоми 26 соли фаъолият Тоҷикистон роҳандозӣ кардааст, беназир мебошад. Мо дар якҷоягӣ кори худро идома медиҳем, то шароити кӯдаконро дар Тоҷикистон аз ин ҳам беҳтар намоем. Ҳоло ҳам ҳастанд кӯдаконе, ки маъюбанду дар деҳаҳои дурдаст зиндагӣ мекунанд ва аз дастгириҳои мо на он қадар баҳраманд мегарданд. Сарвари давлати шумо муҳтарам Эмомалӣ Раҳмон дар чандин паёмҳояшон дар ин мавзӯъ изҳори назар карда буданд, ки ин аз таваҷҷуҳи Роҳбари давлати тоҷикон ба ин қишри ҷомеа мебошад. Дар охир пешниҳод мекунам, ки мо дар якҷоягӣ тамоми шаҳрҳои Тоҷикистонро ҳамчун шаҳрҳои хайрхоҳ барои кӯдакон табдил диҳем”.

Дар давоми форум маърӯзаҳо аз ҷониби Умарзода Саида Ғайрат, муовини якуми вазири тандурустӣ ва ҳифзи иҷтимоии аҳолӣ дар мавзӯи “Ҳазор рӯзи аввали тиллоии ҳаёт- калиди рушди устувор”, Латофат Назирӣ, муовини вазири маориф ва илми Ҷумҳурии Тоҷикистон дар мавзӯи “Ҳуқуқи дастрасии кӯдак ба таҳсилот”, Нодирӣ Шаҳноза Анвар, муовини вазири адлияи Ҷумҳурии Тоҷикистон дар мавзӯи “Таъмини ҳифзи ҳуқуқҳои кӯдак дар Ҷумҳурии Тоҷикистон” ва Раҷабмоҳ Ҳабибуллозода, ваколатдор оид ба ҳуқуқи кӯдак дар Ҷумҳурии Тоҷикистон дар мавзӯи “Нақши Конвенсияи Созмони Милали Муттаҳид оид ба ҳуқуқи кӯдак дар Ҷумҳурии Тоҷикистон” ироа гардиданд.

Қисмати дуюми форум дар бахшҳои алоҳида доир шуда, меҳмонон аз Муассисаи давлатии “Маркази кӯдакон ва наврасони шаҳри Душанбе” ва боғи кӯдакон боздид ба амал оварданд.