22 – юми феврал таҳти ин унвон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Китобхонаи миллӣ бахшида ба 30-солагии таъсисёбии Қувваҳои Мусаллаҳ конференсияи ҷумҳуриявии илмӣ – амалӣ баргузор гардида, намоиши филми “Пешво” – и МД рӯзномаи “Ҷавонони Тоҷикистон” оғозбахши он гардид.

Дар конференсияи мазкур Абдулло Раҳмонзода, раиси Кумитаи кор бо ҷавонон ва варзиш, Асрор Латифзода, муовини раиси Ҳизби Халқии Демократии Тоҷикистон, Рустам Шоҳмурод, раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба тартиботи ҳуқуқӣ, мудофиа ва амният ва раисони кумитаҳои иҷроияи ҲХДТ дар вилоятҳо ва шаҳру ноҳияҳои ҷумҳурӣ ва намояндагони вазорату идораҳои гуногуни давлатӣ иштироку суханронӣ намуданд.

Баъди садо додани Суруди миллӣ Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баромад намуда, таъкид кард: “Таърих гувоҳ аст, ки қувваҳои мудофиавӣ дар ҳамаи давраҳои рӯзгори инсоният ҳамчун воситаи асосии ҳифзи амният ва таъмини мавҷудият хидмат карда, дар муҳофизати қаламрави давлатҳо ва таъмини суботу оромиши мардум нақши аввалиндараҷа дорад. Омӯзиши таърихи давлатдории тоҷикон аз гузашта то имрӯз шаҳодат аз он медиҳад, ки дар тӯли таърих гузаштагони мо аз артишдорон буданд. Ҳазорҳо нафар фарзандони ҷасуру диловари ин миллат бо эҳсоси баланди ватандорӣ на фақат дар ҳифзи марзу буми аҷдодии хеш қаҳрамониву диловарӣ нишон додаанд, балки барои ҷаҳониён миллати сарбаланди тоҷикро ҳамчун халқи истиқлолхоҳу озодихоҳ, ватандору ватанпараст ва озодандеш муаррифӣ сохтаанд”.

Дар идома гуфта шуд, ки Артиши миллии Тоҷикистон бо ибтикор ва талошҳои бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон таъсис ёфта, он дар таҳкими сулҳу субот ва ваҳдату ягонагӣ саҳми бузург гузоштааст. Маҳз Артиши миллӣ аст, ки марзу буми Ватан ҳимоят гардида, сокинони меҳан орому осуда ҳаёт ба сар бурда истодаанд.

Дар охир аз ҷониби раиси Кумита ба як қатор раисони кумитаҳои иҷроияи ҲХДТ дар вилоятҳо ва шаҳру ноҳияҳои ҷумҳурӣ сипосномаҳо тақдим карда шуд.