13 июл дар толори маҷлисгоҳи Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ҷаласаи ҳайати мушовараи Кумита оид ба ҷамъбасти фаъолияти соҳаи кор бо ҷавонон ва варзиш дар нимсолаи якуми соли 2023 ва вазифаҳо барои минбаъда баргузор шуд.

Дар ин бора бахши таҳлил ва иттилооти Кумитаи кор бо ҷавонон ва варзиш иттилоъ додааст.

Дар ҷаласа Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муҳиддин Пайшанбезода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, муовинони раиси Кумита, кормандони дастгоҳи марказӣ ва зерсохторҳои Кумита иштирок карданд.

Дар ҷаласа фаъолияти Кумита ва сохторҳои тобеи он дар нимсолаи аввали соли ҷорӣ натиҷагирӣ карда шуда, вазифаҳо барои нимсолаи дуюм мавриди баррасӣ ва муҳокима қарор гирифт.

Шабнам Раҳимзода, муовини якуми раиси Кумита оиди масъалаи якуми рӯзномаи маҷлис баромад намуда, доир ба фаъолияти Кумитаи кор бо ҷавонон ва варзиш дар шашмоҳаи аввали соли ҷорӣ ва иҷроиши нақшаи кори Кумита барои нимсолаи аввали соли 2023 ҳисобот дод.

Ҳамзамон дар музокироти масъалаи якуми рӯзнома гузориши Шоҳзод Раҳимзода, сардори Раёсати кор бо ҷавонон ва варзиши шаҳри Душанбе шунида шуд.
Дар ҷараёни ҷаласа Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷиҳати татбиқи пурра ва босамари нақшаҳои тасдиқшуда барои соли 2023 ба масъулини соҳа дастурҳои мушаххас доданд.

Аз ҷумла, дастур дода шуд, ки бо мақсади иҷрои дастуру супоришҳои Паёми навбатии Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва дар сатҳи баланд таҷлил намудани ҷашни муқаддаси 35-умин солгарди Истиқлолияти давлатии Ҷумҳурии Тоҷикистон аз ҳозир омодагии ҷиддӣ дида, дар тамоми деҳаву маҳаллаҳои ҷумҳурӣ бозиҳои футболу волейбол, шашкаву шоҳмот, тенниси рӯйи миз, бозиҳои миллӣ, гӯштини миллӣ бо усули деҳа ба деҳа, чорабиниҳои гуногуни варзишӣ, хонишҳои сиёсӣ бо ҷавонони 14-16 сола ва волидайни онҳо, 17 - 18 сола ва волидайни онҳо, баргузории хонишҳои сиёсӣ бо донишҷӯёни муассисаҳои таҳсилоти миёна ва олии касбӣ, баргузории озмунҳои зеҳнӣ, эҷодӣ, ҳунарӣ ва чорабиниҳои дигари иттилоотӣ-сиёсӣ, конфронсҳо ва ҳамоишу мизҳои муддавар бахшида ба ҷашну санаҳои муҳими миллию давлатӣ миёни ҷавонон доир намуда, инъикоси васеи онро тавассути саҳифаҳои интернетӣ таъмин созанд.

Дар кори ҷаласа Муҳиддин Пайшанбезода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа баромад намуда, нишондиҳандаҳои фаъолияти Кумитаи кор бо ҷавонон ва варзишро дар нимсолаи сипаришуда хуб арзёбӣ намуд ва барои боз ҳам тақвият бахшидани фаъолият дар самти кор бо ҷавонон ва варзиш дастурҳои муфид дод.

Дар охир аз ҷониби раиси Кумита як қатор масъулини соҳа, ки нимсоларо бо муваффақият ҷамъбаст намуданд, бо Сипоснома ва туҳфаҳои хотиравӣ қадрдонӣ шуданд.