7 январ дар Осорхонаи миллии Тоҷикистон ҷаласаи ҷамъбастӣ оид ба натиҷагирии фаъолияти Ташкилоти ҷамъиятии “Пайравони Пешвои миллат”-и Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соли 2020 ва таҳияи дурнамою нақшаҳои кории ташкилоти мазкур дар соли 2021 бо иштироки 120 нафар аъзои ташкилот аз шаҳри Душанбе ва шаҳру ноҳияҳои тобеи марказ баргузор гардид.

Дар ҷаласаи мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок намуда, зимни баромади хеш ба волонтёрон - аъзоёни Ташкилоти ҷамъиятии “Пайравони Пешвои миллат” барои саҳмашон дар баргузории чорабиниҳои муҳими сиёсӣ, иштироки фаъолонаи онҳо дар шанбегиҳо ва ҷасурона хизмат намудан ба мардум дар давраи бемории сироятии COVID-19 баҳои баланд дод.

Дар идомаи ҷаласаи ҳисоботӣ роҳбарони маҳфилҳои доимоамалкунандаи Кумитаи кор бо ҷавонон ва варзиш, роҳбари Маҳфили адибони ҷавони навқаламу эҷодкор - Динора Ҷабборзода, роҳбари Маҳфили “Фуруғи субҳи доноӣ китоб аст”- Ҷамолиддинзода Сорбон, роҳбари Маҳфили “Ҳуқуқшиносони ҷавон” - Хайлонов Давлат ва роҳбари волонтёрон - Нурзода Раббонӣ аз натиҷаи фаъолияти маҳфилҳояшон гузориш доданд. Сипас аз ҷониби раиси Ташкилоти ҷамъиятии “Пайравони Пешвои миллат” Абдулло Раҳмонзода тавсияҳои муфид барои таҳияи нақша ва тақвияти фаъолият дода шуд.

Дар фарҷоми ҷаласа чанде аз ғолибони озмуни ҷумҳуриявии “Фуруғи субҳи доноӣ китоб аст”, ки аъзоёни маҳфилҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон мебошанд ва дигар
аъзоёни фаъоли маҳфилҳои мухталифи Кумита бо сипоснома ва туҳфаҳои хотиравӣ қадрдонӣ шуданд.