Бо ташаббуси Муассисаи давлатии “Маркази ҷумҳуриявии ташаккули тарзи ҳаёти солим” ва дастгирии Лоиҳаи Сино 16-уми ноябр дар меҳмонхонаи “Атлас”-и шаҳри Душанбе барои зиёда аз 30 нафар кормандони воситаҳои ахбори оммаи манотиқи гуногуни кишвар таҳти унвони “Ташаккули фарҳанги муошират ва рафтор” тренинги омӯзишӣ доир шуд.

Тренинги мазкурро устодони Донишгоҳи миллии Тоҷикистон профессор Ҷовид Муқим ва Маҳмадулло Давлатов гузарониданд. Дар тренинги ҷанбаҳои равонӣ ва касбии журналистон ҳангоми доир кардани суҳбат ва бархурди журналистон бо ҷомеа баррасӣ шуд.

Ҳадаф аз созмон додани чунин тренингҳоро Парвина Мухторова, директори МД “Маркази ҷумҳуриявии ташаккули тарзи ҳаёти солим” омӯзонидани тарзи дурусти фарҳанги муошират ва рафтор, василаи дурусти гирифтани иттилоот, пешниҳоди иттилоот ва донишҳои дақиқ барои журналистон, ҷалби тавваҷуҳи журналистон ба инъикоси мавзуъ ва афзун гардонидани малакаи касбии хабарнигорон арзёбӣ намуда таъкид кард, ки дар ҳама гуна фаъолияти касбӣ ахлоқ ва одоби муошират пеш аз ҳама меистад.

Зимни омӯзошҳо ба иштироккунадагон лексияҳо, тамринҳо, бозиҳои амалӣ ва машғулиятҳои гуногуни вобаста ба касбияти рӯзноманигорон доир шуд, ки барои фаъолияти минбаъдаи рӯзноманигорони ҷавон нақши муассир хоҳад гузошт.

Тренинги омӯзишӣ давоми як рӯз идома карда, дар ҷамъбаст ба ҳар як иштирокчӣ сертификат супорида шуд.

Тибқи нақша чунин тренингҳои омӯзишӣ давоми солҳои 2018 дар шаҳру навоҳии дигар кишвар ҳам баргузор хоҳад шуд.