Фармони Президенти Ҷумҳурии Тоҷикистон дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд, аз 5 март ба имзо расид.

Дар ин хусус Хадамоти матбуотии Президенти Ҷумҳурии Тоҷикистон хабар медиҳад.

Дар фармони мазкур омадааст, хизматчиёни ҳарбие, ки муҳлати муқарраргардидаи хизмати ҳарбиро адо намудаанд, моҳҳои апрел-майи соли 2024 ба эҳтиёт рухсат дода шаванд.

Ҳамзамон тибқи ин фармон моҳҳои апрел-майи соли 2024 шаҳрвандони солҳои таваллуди 1997-2006 Ҷумҳурии Тоҷикистон ба хизмати ҳарбӣ даъват карда мешаванд.

Раисони шаҳру ноҳияҳо якҷо бо комиссариатҳои ҳарбӣ бо мақсади амалӣ намудани муқаррароти моддаи 34 Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ”, даъвати муташаккилонаи шаҳрвандонро ба хизмати ҳарбӣ ба роҳ монанд.

Инчунин Вазорати фарҳанги Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Кумитаи телевизион ва радиои назди Ҳукумати Ҷумҳурии Тоҷикистон барои тарғибу инъикоси васеи даъвати шаҳрвандон ба хизмати ҳарбӣ вазифадор шудаанд.

Гулафшон КАРИМОВА, “ҶТ”