Файзиддин Қаҳҳорзода, вазири молияи Ҷумҳурии Тоҷикистон 8 август зимни нишасти хабарӣ изҳор дошт, ки иҷрои буҷети давлатӣ дар ин давра 111,5 фоизро ташкил дода, ҳаҷми умумии воридот ба 27,5 миллиард сомонӣ расидааст.

Ба гуфтаи ӯ, танҳо аз ҳисоби фаъолияти Кумитаи андоз ба буҷет 12,7 миллиард сомонӣ ворид гардидааст, ки 1,5 миллиард сомонӣ аз нақша бештар аст. Ҳамзамон, Хадамоти гумрук ба буҷет 5,7 миллиард сомонӣ ворид намудааст, ки 112,2 фоизи иҷроиши нақшаро ташкил медиҳад.

Вазири молия зикр кард, ки ба ҳолати 1 июли соли 2025 ҳаҷми умумии қарзи давлатӣ 3,6 миллиард доллари амрикоиро ташкил дода, он ба 21,4 фоизи маҷмӯи маҳсулоти дохилӣ баробар аст. Аз ин маблағ, 3,1 миллиард доллар ё 88 фоиз қарзи берунӣ мебошад.

З. ҚОСИМОВА, “ҶТ”