20 феврал дар Филармонияи давлатии Ҷумҳурии Тоҷикистон ба номи Акашариф Ҷӯраев бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо сохторҳои қудратии мамлакат фестивали ҷумҳуриявии “Таронаи сарбоз” ва “Гулчини сурудҳои ватандӯстона” бахшида ба 28–солагии Артиши миллии Ҷумҳурии Тоҷикистон доир гардид.

Дар чорабинии мазкур роҳбарони вазорату идораҳо, ташкилоту муассисаҳо, сарбозону афсарони қисмҳои низомӣ, донишҷӯёни муассисаҳои олӣ ва толибилмони муассисаҳои таълимии ҳудуди шаҳри Душанбе иштирок намуданд.

Нахуст Сатториён Матлубахон, муовини Сарвазири Ҷумҳурии Тоҷикистон баромад намуда, ҳозирин ва сарбозону афсарони кишварро бахшида ба Рӯзи Артиши миллӣ шодбош гуфт.

Номбурда зимни баромади хеш нақши Артиши миллӣ ва сарбозону афсарони мамлакатро дар пойдории сулҳу субот муҳим арзёбӣ намуда, аз ҷумла афзуд: “Бо ифтихор метавон гуфт, ки дар сиёсати пешгирифтаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пуштибонӣ ва дастгирии ҳамешагии ҳар яки шумо афсарону диловарони миллат ва фарзандони сарсупурдаи Ватан нақши меҳварӣ дорад. Муҳимтар аз ҳама Сарвари давлат дар ҳар як мулоқоту суханрониашон аз эътимоду боварӣ ва қудрату тавонмандии ҳар яки шумо сухан мекунад, ки ин бовариву эътимод шаҳодати он аст, ки воқеан имрӯз Артиши миллӣ дар симои ҳар яки шумо сипари боэътимоди Ватан ва кафолати ҳифзи марзу буми кишвар буда, пайваста пояҳои он тақвияту таҳким меёбанд. Боиси таъкид аст, ки маҳз дар асоси дастуру ҳидоятҳои Пешвои муаззами миллат пайваста чорабиниҳои гуногун доир мегарданд, ки ба афзудани ҳисси ватандӯстӣ, ифтихори миллӣ ва хештаншиносии ҷавонон муосидат мекунанд”.



Сипас, Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баромад карда, ҳамаи иштирокчиёни фестивал ва тамоми сарбозону афсарони шуҷои кишварро бо ҷашни фархундаи Рӯзи Артиши миллии Ҷумҳурии Тоҷикистон табрик намуданд. Раиси Кумита қайд намуданд, ки: “Мо имсол бо ифтихор таҷлили 30-солагии Истиқлолияти давлатии Ҷумҳурии Тоҷикистон ва 28-умин солгарди таъсисёбии Қувваҳои Мусаллаҳи Ҷумҳурии Тоҷикистонро дар фазои сулҳу субот бо рӯҳияи баланди ватандӯстиву хештаншиносӣ ҷашн мегирем. Воқеан, Артиши миллӣ ба такягоҳи асосии давлат ва сипари боэътимод табдил ёфта, Ватан ва арзишҳои миллиамонро содиқона муҳофизат мекунад. Бо ғамхориҳои пайвастаи давлату Ҳукумати кишвар зери роҳбарии Сарфармондеҳи Олии Қувваҳои Мусаллаҳи Ҷумҳурии Тоҷикистон, муҳтарам Эмомалӣ Раҳмон айни замон Артиши миллӣ қодир аст, ки амнияти давлату миллат ва ҳифзи марзу буми кишварамонро пурра таъмин намояд”.

Номбурда дар идома иброз дошт, ки “Хизматчиёни ҳарбию ҳайати шахсии ҷузъу томҳои Қувваҳои Мусаллаҳ дар тӯли 28 соли фаъолият дар ҳама лаҳзаҳои душвор ҷасорату мардонагӣ ва садоқат ба савганди ҳарбиро нишон дода, омода будани худро барои ҳифзи сарзамин ва дастовардҳои истиқлолият, пойдории сулҳу субот, сохтори конститутсионӣ ва ҷони худро дар роҳи Ватан нисор намудан, исбот кардаанд. Ҳоло барои он ки ин давлат, ин марзу бум ва ин сарзамини муқаддаси воқеан биҳиштосо насиби ҷовидонии миллати куҳанбунёди тоҷик бошад, мову шумо ва насли ҷавони имрӯза бояд бо эҳсоси гарму ифтихор аз давлати соҳибихтиёри худ дифоъ намуда, онро самимона дӯст дорем, бо таъмини волоияти қонун, таҳкими Ваҳдати миллӣ ва худшиносиву худогоҳӣ ҳар зарра хоки он ва ҳар ваҷаб замини онро чун гавҳараки чашм ҳимоя карда, ба хотири ободиву шукуфоияш талош намоем”.

Дар ҷараёни чорабинӣ ҳамчунин таъкид гардид, ки Ватанро дӯст доштан, бо он ифтихор кардан, барои ҳимояи он омода будан, ба қадри сулҳу субот, осудагиву ваҳдат ва истиқлолият расидан, шукронаи соҳибватаниву соҳибдавлатӣ кардан ва эҳтироми падару модарро ба ҷо овардан, аз ҷумлаи арзишҳое мебошанд, ки ҳар яки мову шумо-ҷавонон бояд ин арзишҳоро дастури зиндагии ҳаррӯзаи худ қарор диҳем ва итминон дошта бошем, ки танҳо дар ҳамин сурат метавонем, кишвари воқеан ободу пешрафта ва тавоно бунёд намоем.

“Ҳамаи мо дар назди халқу Ватан вазифадор ҳастем, ки сулҳи пойдор ва якпорчагии Тоҷикистони азизро чун гавҳараки чашм ҳифзу нигаҳбонӣ кунем, Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Тоҷикистон, муҳтарам Эмомалӣ Раҳмон ва халқи азизамонро бовар кунонем, ки бо хизмати намунавӣ ва бо меҳнати созанда қудрати иқтисодӣ ва неруи мудофиавии давлатамонро афзун менамоем. Бо дилу ҷон ба Ватан хизмат карда, доимо бар он кӯшем, ки мамлакатамон ҷавлонгоҳи меҳнату зиндагии осоишта ва хуррамбоғи фароғату роҳати пирон ва дунёи равшану босафои кӯдакон бошад. Зеро хизмат кардан ба Ватан вазифаи муқаддас ва шарафи бузург аст”, - иброз дошт Абдулло Раҳмонзода, раиси Кумитаи кор бо ҷавонон ва варзиш.

Баъди суханони ифтитоҳӣ-табрикотӣ аз тарафи гурӯҳи овозхонони ба фестивал ташрифоварда, барномаи фарҳангию фароғатӣ тақдим гардида, дар он намояндагони оркестрҳои қисмҳои низомӣ, сарбозону афсарон ва як қатор овозхонҳои дигари кишвар сурудҳои худро дар мавзӯъҳои “Ватандӯстӣ”, “Тоҷикистон”, “Марзу бум”, “Муқаддасоти миллӣ”, “Ҷавонӣ, ишқ ва ҳаёти зебои даврони хизмати Ватан - Модар” сароиданд.

Маврид ба зикр аст, ки фестивали мазкур ҳамасола дар арафаи таҷлили солгарди ҷашни Рӯзи таъсисёбии Қувваҳои Мусаллаҳи Ҷумҳурии Тоҷикистон баргузор гардида, намоиши чунин фестивалҳо имкон медиҳад, ки сатҳи маърифатнокии сарбозону афсарон ва ҷавонони меҳан дар рӯҳияи эҳтиром ба рукнҳои давлатдорӣ ва омода будан, барои муҳофизати ватани хеш баланд гардад.

Дар қисмати дуюми чорабинӣ сарояндагони хушсадо тавонистанд, бо сурудҳои ватандӯстонаю меҳанпарваронаи худ иштирокчиёни фестивалро шод гардонанд.

Дар фарҷоми чорабинӣ аз тарафи Кумитаи кор бо ҷавонон ва варзиш ба сарояндагони беҳтарин сурудҳои фестивал Сипоснома ва туҳфаҳои хотиравӣ тақдим гардид.

Қиёмиддин МАҲМАДҶОНОВ
“ҶТ”