Зариф Ализода, роҳбари Ваколатдор оид ба ҳуқуқи инсон дар Тоҷикистон аз фирори баъзе мардон ба Русия ба хотири таъмини иҷтимоӣ ё надодани алимент нигаронӣ карда афзуд, ки “дар ҳоле ин нафарон ба Русия фирор мекунанд, ки 2-3 кӯдаки ноболиғ доранду онҳо ба таъмин ниёз доранд”.

Ӯ рӯзи 22 январ зимни нишасти матбуотии ин ниҳод қайд намуд, ки: “Дар соли 2017 ба Дастгоҳи Ваколатдор оид ба ҳуқуқи инсон ҳамагӣ 26 нафар ба хотири муқаррар кардани алимент, саркашӣ аз пардохти он, иҷро нагардидани ҳалномаҳои судӣ дар ин самт, муайян набудани суроғаи ҷавобгар муроҷиат намудаанд. Назар ба соли гузашта шумораи муроҷиаткунандагон 13 нафар зиёд аст. Дақиқ аст, ки шумори нафарони саркаш барои надодани алимент дар кишвар хеле зиёд аст. Аммо дар бисёри ҳолатҳо шаҳрвандон ба мо муроҷита намекунанд”.

Ҳамчунин дар нишаст доир ба дигар пуҳлӯҳои фаъолияти Ваколатдор оид ба ҳуқуқи инсон гузориш дода шуд. Аз ҷумла гуфта шуд, ки дар соли 2017 3864 муроҷиати шаҳрвандон доир ба муҳокимаи одилонаи судӣ, ҳуқуқ ба манзил, ҳуқуқи инсон ва мақомоти ҳифзи ҳуқуқ ва ғайра ба қайд гирифта шуданд, ки нисбат ба соли 2016 (3558) 304 адад бештар мебошад. Аз ин нишондод 739 адад муроҷиат хаттӣ ва 3125 адад шифоҳӣ мебошанд.