ҶОМЕА
Душанбе 26 Октябр 2020 11:09
7341
Ё худ вақте ки фарзандон бе падару модар ба воя мерасанд

Имрӯз дар Вилояти Мухтори Кӯҳистони Бадахшон кӯдакону наврасони зиёде ҳастанд, ки падару модари онҳо дар муҳоҷирати меҳнатӣ қарор дошта, фарзандонашон дар назди волидони падару модар тарбия мегиранд. Албатта, баъзе волидон бар онанд, ки агар фарзандон муддате дар парастории бобокалону модаркалон монанд, ягон осебе намерасад, баръакс калонсолон онҳоро сари вақт мехӯронанду мепӯшонанд. Инчунин, фарзанд таҳти назорати калонсолон ба муассисаи томактабӣ ё худ мактаб мераваду ба ҳамин тартиб ҳамааш мувофиқи мақсад хоҳад буд.

Аммо баъзан кӯдакону наврасон рафтани волидон ба муҳоҷиратро чун бевафоӣ нисбати худ пазируфта, баъдан душвортарбия мегарданд.

Ба гуфтаи Мусаллам Давлатқадамов, корманди Шуъбаи пешгирии ҳуқуқвайронкунӣ байни ноболиғону ҷавонони Раёсати Вазорати корҳои дохилӣ дар ВМКБ бе волидон тарбия ёфтани фарзандон яке аз масоили доғи вилоят ба шумор рафта, имрӯзҳо садҳо кӯдакону наврасон ва ҷавонон аз тарбияи падару модар фосила гирифтаанд.

- Давоми чанд сол аст, ки тамоюли ҷиноятсодиркунӣ миёни наврасону ҷавонони дар тарбияи хешовандон қарордошта, бештар гардида истодааст. Баъзе фарзандон дар тарбияи амаку хола ё дигар хешони наздик монда, дарди сару доғи онҳо мешаванд. Феълан бо кӯдакону наврасони зиёде сару кор дорем, ки ҳатто ба ҳарфи хешону калонсолон гӯш надода, тарбияи маънавии онҳо сусту заиф гардидааст ва мо маҷбурем, ки пайваста тавассути омӯзгорони мактабу таълимгоҳ бо фарзандон суҳбату вохӯриҳои гурӯҳӣ ё инфиродӣ гузаронем, - иброз намуд номбурда.

“Дар ҳолатҳои зиёд волидони дар муҳоҷиратбуда ҳам “бозиҳои дугона” доранд”, - мегӯяд М. Давлатқадамов. - Аз як тараф онҳо ба номи фарзандонашон тавассути номи парасторон аз Русия пул фиристода, аз ҷониби дигар ба таври инфиродӣ ба кӯдакон маблағу молро равон мекунанд. Яъне аз ин тасмимгирии волидон фарзандон бевосита танбаливу эркагиро пеша карда, ба қадри неъматҳои моддиву маънавӣ намерасанд ва баъдан ба аъмоли ношоиста, аз қабили сигоркашиву майхӯрӣ, майдаавбошӣ ё дигар ҷиноятҳо ҳам даст мезананд, - афзуд корманди РВКД.

Равоншиносон бар онанд, ки воқеан ҳолатҳое ҳастанд, кӯдаконро модаркалону падарбузургашон ба камол расонда, онҳо соҳибмаълумоту ифтихори оила мешаванд. Аммо дар ҳар ҳолат вазъи рӯҳиву равонии онҳо беҳбуд намеёбад. Зеро ҳангоми тарбия ёфтан, фарзанд тамоми муҳити атрофро дарк мекунаду рӯзе пай мебарад, ки бо сабаби муайян падару модар худро аз ӯ канор гирифтаанд. Хосса, аз ҳама дардовараш он аст, ки агар волидони дар муҳоҷиратбуда аз ҳамдигар ҷудо шуда бошанду ҳар кас аз пайи бунёди ҳаёти нави хеш аст. Лекин дар ин муддати дароз фарзанд аллакай чун шахси дигар, орӣ аз муҳаббату самимият ба камол мерасад.

Дилрабо Душанбиева, сокини маҳаллаи Носири Хусрави шаҳри Хоруғ соҳиби ду фарзанди хурдсол мебошад. Ӯ мегӯяд, ки чанде қабл аз пайи ёфтани кору фаъолияти шоиста шуда, ҳатто наздиконаш дар ин тасмимгирӣ ӯро насиҳат карда буданд.

“Наздиконам гуфта буданд, ки бояд фарзандони хурдсолро монда, ба муҳоҷирати меҳнатӣ равам, аммо банда ин қарори онҳоро рад кардам. Зеро аз “таҷриба”- и ҳамсоягони наздики хеш сабақ гирифтам. Ҳашт сол аст, ки онҳо ду фарзанди худро дар тарбияи модаркалон монда, ба Русия рафтанд ва дигар наомаданд. Кампири ҳамсоя ҳамарӯза пеши банда омада, ашк мерезонад, ки аз ӯҳдаи тарбияи наберагонаш набаромада, намедонад чӣ кор кунад. Бигузор бекору бемол бошам, аммо намехоҳам аз фарзандонам ҷудо бошам”, - иброз дошт Д. Душанбиева.

Азорабек Сардорбеков, журналисти рӯзномаи “Бадахшон” ва сокини ҷамоати Тусиёни ноҳияи Роштқалъа мегӯяд, ки дар ҷамоати болозикр зиёда аз 60 нафар чунин кӯдакон зиндагӣ доранд ва касе намедонад ояндаи онҳо чӣ мешавад.

Ба таъкиди номбурда, то ҳол омори мушаххас дар бораи ин кӯдакон дар сатҳи вилоят низ мавҷуд нест, аммо нисбати ин масъала тадбирҳои заруриро бояд дида шавад.

Кӯдакон ояндаи дурахшони моянд. Вале агар дар таълиму тарбияи онҳо аз тарафи падару модар саҳлангорӣ шавад, ин оқибати нохушро ба бор меорад. Пас, ҳамаи кӯшишҳоро сараввал барои бо фарзандон будан бояд намуд ва баъдан фикри таъмини моддиёти онҳоро кард. Зеро аз набудани волидон дар ҳаёти фарзанд иттиҳоди хонаводагӣ суст гашта, тадриҷан ҷомеа ҳам носолим мешавад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Октябр 2020 c.