-Дар нимсолаи аввали соли 2019 фурудгоҳҳои байналмилалии Ҷумҳурии Тоҷикистон (Душанбе, Хуҷанд, Кӯлоб ва Бохтар) дар ҷамъбаст (қабул ва гусел) ҳамагӣ ба 1 млн. 71,4 ҳазор нафар мусофир хизмат расонидааст, ки назар ба ҳамин давраи соли гузашта 145,6 ҳазор нафар мусофир ё 15,7% зиёд аст, - афзуд Икром Субҳонзода, директори Агентии авиатсияи граждании назди Ҳукумати кишвар, 26 июл, зимни нишасти хабарӣ. 

Ба таъкиди номбурда дар ин нимсола фурудгоҳҳои байналмилалии кишвар ва КВД “Тоҷикаэронавигатсия” дар умум 360,8 млн. сомонӣ даромад ба даст овардаанд, ки ин нишондиҳанда нисбат ба ҳамин давраи соли гузашта 74,1 млн сомонӣ бештар мебошад. Инчунин аз ҷониби корхонаҳои мазкури авиатсионӣ дар давраи ҳисоботӣ 85,1 млн. сомонӣ ба буҷети давлатӣ пардохт карда шудааст, ки ин нисбат ба шашмоҳаи аввали соли гузашта наздики 30 млн. сомонӣ зиёд аст.

Дар идома гуфта шуд, ҶСК “Тоҷик Эйр” барои интиқоли зоирин дар мавсими “Ҳаҷ-2019” омодагии пурра гирифта, барои ин кор ҳавопаймои Боинг-767 аз таъмир бароварда шуда, имрӯз-26 июл аллакай парвози аввалин ба шаҳри Ҷидда анҷом дода шуд.