Дар Варзишгоҳи ҷумҳуриявӣ марҳилаи ниҳоӣ ва маросими ҷамъбастию қадрдонии ғолибони мусобиқаи варзишӣ оид ба футбол байни дастаҳои деҳаҳо ва маҳаллаҳои аҳолинишини Ҷумҳурии Тоҷикистон баргузор гардид. Ин мусобиқа бо ҷалби дастаҳои беҳтарин аз минтақаҳои гуногуни кишвар доир шуда, ба яке аз чорабиниҳои муҳими оммавию варзишӣ табдил ёфт.

Дар ҷараёни мусобиқа дастаҳо маҳорати хуби футболбозӣ, омодагии ҷисмонӣ ва руҳияи баланди рақобатпазирии худро нишон доданд. Бозиҳо дар фазои дӯстона, вале ҳамзамон рақобатнок сурат гирифта, таваҷҷуҳи васеи мухлисон ва дӯстдорони футболро ба худ ҷалб намуд. Қувваозмоиҳо нишон доданд, ки футбол дар байни аҳолӣ, бахусус ҷавонон, ҷойгоҳи хос дошта, рӯз ба рӯз рушд меёбад.

Ҳадафи асосии баргузории чунин мусобиқаҳои оммавию варзишӣ тарғиби тарзи ҳаёти солим, ҷалби ҷавонон ба варзиш, рушди футбол дар маҳалҳо ва таҳкими дӯстию ҳамбастагӣ миёни сокинони кишвар мебошад. Инчунин мусобиқа барои дарёфти истеъдодҳои нав ва ташаккули фарҳанги варзишӣ дар ҷомеа нақши муҳим дорад.

Дар фарҷоми мусобиқа маросими тантанавии қадрдонии ғолибон баргузор гардида, дастаҳои беҳтарин бо Ҷом, медал, диплом ва мукофотпулӣ сарфароз гардонида шуданд. Аз ҷумла, ҷойи аввалро дастаи шаҳру ноҳияҳои тобеи ҷумҳурӣ-1 ишғол намуда, бо Ҷоми мусобиқа ва маблағи 35 000 сомонӣ қадрдонӣ гардид. Ҷойи дуюм насиби дастаи “Хатлон-2” шуда, онҳо бо 30 000 сомонӣ мукофотпулӣ сарфароз гаштанд. Ҳамчунин дастаи “Хатлон-1” сазовори ҷойи сеюм гардида, бо маблағи 25 000 сомонӣ қадрдонӣ шуд.

Баргузории чунин мусобиқаҳо дар сатҳи ҷумҳурӣ ба рушди минбаъдаи футбол, тақвияти ҳамкориҳои варзишӣ байни минтақаҳо ва ташвиқи насли ҷавон ба шуғли мунтазами варзиш заминаи мусоид фароҳам оварда, саҳми назаррас дар таҳкими саломатии ҷомеа мегузорад.

Яҳё МАҲМАДНАБИЕВ, “ҶТ”